सुदूरपश्चिमको विकास भएमात्रै देशको विकास हुन्छ : राजेन्द्र मल्ल
काठमाडौँ, २६ मंसिर । नेपाल चेम्बर अफ कमर्सका निर्वतमान अध्यक्ष राजेन्द्र मल्लले सुदुरपश्चिमको समग्र विकास भएपछि मात्रै मुलुकले आर्थिक समृद्धि हासिल गर्ने बताउनुभएको छ ।
सुदूरपश्चिम चेम्बर अफ कमर्सको नवनिर्वाचित कार्यसमितिलाई कैलालीमा बधाई तथा शुभकामना दिने क्रममा निर्वतमान अध्यक्ष मल्लले प्रदेशको कृषि, पर्यटन, जलविद्युत् विकास मार्फत समृद्धिको मार्गचित्र कोर्नु पर्ने बताउनुभयो ।
उहाँले भन्नुभयो, ‘राजनीतिक दृष्टिकोणले सुदुरपश्चिम प्रदेश सधैँ केन्द्रमा छ । प्रदेशमा भएको प्राकृतिक श्रोत, कृषि, , सांस्कृतिक रहनसहनलाई प्रर्वद्धन गर्न हामी व्यवसायीको पनि महत्त्वपूर्ण योगदान रहिआएको छ ।’
प्रचुर सम्भावना भएर पनि सुदूरपश्चिम प्रदेशले विकासमा अपेक्षित फड्को मार्न नसकेको उहाँको भनाइ छ । सुदूरपश्चिम प्रदेशमा रहेको कृषि, पर्यटन, जलविद्युत् क्षेत्रमा लगानी वृद्धि गरी रोजगारी सिर्जना गर्नु पर्नेमा उहाँले जोड दिनुभयो ।
यस्तै, उहाँले सुदुरपश्चिमका जिल्लाहरुबाट सामान्य मजदुरीका लागि समेत भारत जानुपर्ने बाध्यतालाई तत्काल हटाउनेगरी औद्योगिक वातावरण बनाउनुपर्ने बताउनुभयो ।
चेम्बरका उपाध्यक्ष सन्तोष पाण्डेले सुदूरपश्चिमको स्थानीय कृषि उपजहरुको बजारीकरण गर्नुपर्ने बताउनुभयो । सुदूरपश्चिम प्रदेश अन्तर्गतका जिल्लाहरुमा उत्पादन हुने वस्तुहरुहरुको व्यवासायिक खेती मार्फत् उत्पादन वृद्धि गर्नुपर्ने र अन्य प्रदेशका मुख्य मुख्य सहरहरुमा बजारीकरण गर्नुपर्नेमा उपाध्यक्ष पाण्डेले जोड दिनुभयो ।
प्रदेशका विभिन्न क्षेत्रमा निजी क्षेत्रको लगानी आर्कषित गर्नका लागि चेम्बर अफ कमर्सले पनि सहजीकरण गर्ने उहाँको भनाइ छ । सुदूरपश्चिम प्रदेशमा उत्पादन वृद्धि रोजगारी सिर्जना गर्न लगानीको वातावरण र नीतिगत स्थिरताको आवश्यक्ता रहेको उपाध्यक्ष पाण्डेको भनाइ छ ।