सांस्कृतिक पर्व भाँड्ने काम कसैले गर्नु हुँदैन : प्रधानमन्त्री ओली
काठमाडौँ, १७ कात्तिक । प्रधानमन्त्री केपी शर्मा ओलीले सांस्कृतिक पर्वलाई भाँड्ने खालका क्रियाकलाप कसैले गर्न नहुने बताउनुभएको छ ।
नेपाल सम्वत् नयाँ वर्ष ११४५ का अवसरमा आज मूल समारोह समितिले काठमाडौँको बसन्तपुरमा आज आयोजना गरेको कार्यक्रममा प्रधानमन्त्री ओलीले कुनै यज्ञ चलिरहेका समयमा बाँदर आएर यज्ञ बिथोले जस्तै हाम्रा संस्कृतिक चाड र पर्वलाई बिथोल्ने प्रयास हुन नहुनेमा जोड दिनुभयो ।
प्रधानमन्त्री ओलीले नेवारी संस्कृति र भाषा नेपालको एक समृद्धि संस्कृति र विशेष पहिचानको विषय बनेको चर्चा गर्दै नेपाल सम्वत्लाई कामकाजका भाषाका रुपमा प्रभावकारी कार्यान्वयन, राष्ट्रिय विभूति शंखधर साख्वाका विषयमा अध्ययन अनुसन्धान र कक्षा ९ र १० को ऐच्छिक विषयका रुपमा नेपाल भाषालाई पनि समावेश गर्ने जस्ता यस क्षेत्रका मागका विषयमा सरकारको ध्यान जाने प्रतिबद्धता व्यक्त गर्नुभयो ।
उहाँले नेपाल सम्वत् मूल समारोह समिति आयोजनाका लागि सहयोगस्वरुप विगतमा आफूू हुँदा थालनी भएको र बीचका केही वर्ष रोकिएको १० लाखमा वृद्धि गरी यस वर्ष सरकारले १५ लाख रकम दिएको जानकारी पनि गराउनुभयो ।
उपप्रधानमन्त्री एवम् सहरी विकासमन्त्री प्रकाशमानसिंह, सञ्चार तथा सूचना प्रविधिमन्त्री पृथ्वीसुुब्बा गुरुङ, संघीय सांसद् कृष्णगोपाल श्रेष्ठ, नेकपा (एमाले)का उपाध्यक्ष अष्टलक्ष्मी शाक्य, काठमाडौँ महानगरपालिकाका उपप्रमुुख सुनिता डंगोललगायत सहभागी कार्यक्रममा प्रधानमन्त्री ओलीको भनाइ थियो,‘सबै भाषा र संस्कृति हाम्रा हुन् । नेपाली माटोका यी भाषा र संस्कृतिको संरक्षणमा हामी सबै एक भएर लाग्नुपर्छ ।’
प्रधानमन्त्री ओलीले यसअघि ललितपुरको मंगलबजार र भक्तपुरको नयाँ थिमीमा आयोजित नेपाल सम्वत् नयाँ वर्षका कार्यक्रममा पुुगेर शुुभकामना दिनुभएको थियो ।