कर्मचारीहरु जनताको सेवामा निष्ठापूर्वक समर्पित हुन जरुरी : प्रधानमन्त्री ओली
काठमाडौँ, २२ भदौ । प्रधानमन्त्री एवम् नेकपा (एमाले)का अध्यक्ष केपी शर्मा ओलीले नेपालको लोकतान्त्रिक शासन व्यवस्थामा निजामती सेवाको भूमिका र प्रशंसनीय रहेको बताउनुभएको छ ।
शुक्रबार २१औँ निजामति सेवा दिवसको अवसरमा आज सिंहदरबारमा आयोजित कार्यक्रममा बोल्दै उहाँले विभिन्न शासकीय व्यवस्थामा निजामति सेवाले आफ्नो सहभागिता जनाउँदै आएको बताउनुभयो ।
कर्मचारीले आफ्नो दक्षता अभिवृद्धि गर्न र देशको विकास एवम् जनताको सेवामा निष्ठापूर्वक समर्पित हुन जरुरी रहेको प्रधानमन्त्री ओलीको भनाइ छ ।
उहाँले भन्नुभयो, ‘नेपालको अग्रगामी राजनीतिक परिवर्तनप्रति निजामति कर्मचारीहरुले गरेको प्रत्यक्ष र परोक्ष योगदान प्रशंसायोग्य रहेको छ । निजामति प्रशासनले तानाशाही विरुद्धको संघर्ष, त्यस संघर्षमा खेप्नु परेको पीडा र गर्नु परेको बलिदानले आन्दोलनहरु सफल भएका छन् । लोकतन्त्रका लाभहरुको वितरण आम नागरिकसम्म पुर्याइ जनताको सेवा गर्न, राज्यप्रति नागरिकको भरोसा र विश्वास अभिवृद्धि गर्न निजामति सेवाको भूमिका महत्वपूर्ण हुन्छ । निजामति सेवाको यस्तो भूमिकामार्फत् नै मुलुकको आर्थिक–सामाजिक विकास गर्न सकिन्छ र त्यसैको माध्यमबाट हामीले समृद्ध नेपाल, सुखी नेपालीको राष्ट्रिय आकांक्षा पूरा गर्नुपर्नेछ ।’
उहाँले निजामति कर्मचारीमा उच्च नैतिक आचरण, इमान्दारिता र पेसागत निष्ठामार्फत् जनताप्रति उत्तरदायी र असल शासनको व्यावहारिक अनुभूति प्रदान गर्न सफलता मिलोस् भनी शुभकामना व्यक्त गर्नुभयो ।