इटहरीका मेयर र उपमेयर आमन सामने, विवाद उत्कर्षमा
इटहरी, २४ माघ । मेयर हेमकर्ण पौडेलले प्रशासन शाखामा लगाइएको ताला फुटाइदिएपछि कोशी प्रदेशस्थित सुनसरीको इटहरी उपमहानगरपालिकाभित्रको राजनीतिक विवाद थप उत्कर्षमा पुगेको छ ।
गत ११ माघमा उपप्रमुख संगीता कुमारी चौधरीसहित एमालेबाट निर्वाचित वडाध्यक्षहरूले प्रशासन शाखाका प्रमुख सञ्जिव खड्काको कार्यकक्षमा तालाबन्दी गर्नुभएको थियो ।
तालाबन्दीका कारण सेवाग्राहीलाई सेवा प्रवाहमा समस्या भएको भन्दै पालिका प्रमुख हेमकर्ण पौडेलले ताला फुटाइदिनुभएको हो।
मेयर पौडेलले प्रेस विज्ञप्तिमार्फत भन्नुभएको छ,‘माघ ११ गतेदेखि लागेको ताला नखुल्दा कार्यालयको दैनिक कामकाजमा समेत बाधा पुग्न गएको, त्यसैगरी वडा कार्यालयहरुको सेवा समेत प्रभावित भइ सेवाग्राहीहरुलाई सेवा लिन कठिनाइ भएकाले स्थानीय सरकार प्रमुखको नाताले नगरवासी र सेवाग्राहीको समस्यालाई हृदयङ्गम गर्दै प्रशासन शाखामा लगाइएको ताला खोली कार्यालयबाट प्रदान गरिने सेवालाई नियमित सुचारु गर्न आवश्यक भएकाले उक्त ताला फोरेर काम सुचारु गर्न गराउन बाध्य भएको छु ।’
तर, यस कार्यको एमालेका जनप्रतिनिधि मानेका छैनन् बरु, एमाले जनप्रतिनिधिहरु मेयरको ‘दादागिरी’भन्दै मेयरकै कार्यकक्षमा नै ताला लगाउने चेतावनी दिइरहेका छन् ।
उपमहानगरपालिकाकी उपमेयर चौधरीले भन्नुभयो,‘मेयरजीको दादागिरीमा शैलीमा जुन ताला तोडिएको छ । समाधान दिन सक्नुभएन भने हामी मेयरज्यूको कार्यकक्षमा ताला लगाउँछौँ ।’
इटहरीमा मेयर कांग्रेसका हुन् भने उपमेयरसहितका बहुमत कार्यपालिका एमालेको रहेको छ । ‘सहमति होला जस्तो छैन । ताला लाग्ने जस्तो देखिन्छ,’ स्रोतले भन्यो ।
विवाद के हो ?
खासगरी इटहरीमा तालाबन्दीको अवस्था सिर्जना हुनुको मुख्य कारण भनेको कर्मचारीको सरुवाको विषय हो । गत पौष २८ मा मेयर हेमकर्ण पौडेल र प्रमुख कार्यकारी अधिकृत रामचरित्र मेहताले कर्मचारीको सरुवा गर्नुभएको थियो । सो सरुवामा कांग्रेसले जितेका वडाका बाहेकका कर्मचारी चलाएको भन्दै एमाले आन्दोलित बनेको हो ।
कर्मचारी सरुवा गरेर मेयर पौडेल भारत जानुभएको थियो । त्यसबखत कार्यवाहक मेयरको जिम्मेवारी पाउनुभएकी उपमेयर चौधरीले कर्मचारी सरुवा गर्दा पक्षपात गरेको भन्दै आफ्नो अध्यक्षतामा कार्यपालिका बैठक डाक्नुभयो । कार्यपालिकामा एमालेको बहुमत नै भएकाले ३ माघमा कार्यपालिका सदस्यको बैठकले सरुवाको निर्णय उल्टायो ।
तर, मेयर पौडेल उल्टाएको निर्णय कार्यान्वयन गर्ने पक्षमा छैनन् । अर्कोतर्फ उपमेयरको अध्यक्षतामा बसेको बैठकले उपमहानगरपालिकाका प्रमुख प्रशासकीय अधिकृत रामचरित्र मेहता र शाखा प्रमुख सञ्जिव खड्कालाई नै कारबाहीका लागि सिफारिस गरिएको अवस्था छ । शाखा प्रमुख खड्का भने सातौँ तहमा बढुवा भएर सुनसरीकै देवानगञ्ज गाउँपालिकामा पोष्टिङ हुनुभएको छ ।
‘उहाँको पोष्टिङ भइसकेको छ । उहाँ यहाँ बिदामा भएकाले मंगलबारबाट देवानगञ्ज हाजिर हुनुहुन्छ होला’ उपमहानगरपालिका एक अधिकारले भन्नुभयो ।
विवाद बढ्दै जाँदा तालाबन्दीसम्मको अवस्था आएको हो । उपमेयरले कर्मचारीको कोठामा तालाबन्दी गरेपछि लिखित रूपमा माफी माग्नुपर्ने भन्दै उपमहानगरका कर्मचारी पनि आन्दोलित भएका थिए ।
प्रमुख पौडेलले ताला फुटाएपछि भने कर्मचारीले आन्दोलन फिर्ता लिएका छन् । तर, एमाले कांग्रेसको राजनीतिक विवाद थप चुलिएको छ ।