दल खोलेर एमालेसँग प्रतिस्पर्धा गर्न बालेनलाई एमाले नेताको चुनौती

काठमाडौँ, १९ भदौ । नेकपा (एमाले)का केन्द्रीय सदस्य कृष्णभक्त पोखरेलले अहिले जबरजस्ती रुपमा केपी शर्मा ओलीलाई अनपपुलर भन्ने भाष्य निर्माण गर्न खोजिएको बताउनुभएको छ ।

बुधबार काठमाडौँमा भएको एक समसामयिक राजनीतिक घटनाक्रमका विषयमा आयोजना गरेको साक्षत्कार कार्यक्रमलाई सम्बोधन गर्दै उहाँले यस्ता प्रकारको भाष्यबाट सचेत हुनुपर्ने बताउनुभयो ।

काठमाडौँ महानगरपालिका प्रमुख बालेन्द्र शाह लक्षित गर्दै उहाँले भन्नुभयो, ‘अहिले जबरजस्तरुपमा भाष्य निर्माण गर्न खोजिँदैछ कि केपी ओली अनपपुलर भन्ने भाष्य निर्माण गर्न खोजिएको छ । हामी त्यसो चाहँदैनौँ । लोकतन्त्रमा सबै फूलहरु फुल्न पाउनुपर्छ, हाँस्न पाउनुपर्छ भन्ने कुरा हो ।’

नेता पोखरेलले लोकतन्त्रको विकल्प लोकतन्त्र नै हुने र एउटा दलको विकल्प अर्को दल हुने बताउनुभयो । उहाँले काठमाडौँ महानगरपालिका प्रमुख शाहलाई स्वघोषित पपुलरको संज्ञा दिँदै दल खोलेर एमालेसँग प्रतिस्पर्धा गर्न आउन चुनौती दिनुभयो ।

उहाँले भन्नुभयो, ‘लोकतन्त्रको विकल्प लोकतन्त्र नै हो । एउटा दलको विकल्प अर्को दल हुनसक्ला । अरु साथीहरु आफूलाई स्वघोषित पपुलर भन्नुभएको छ, उहाँहरुले नि गरे हुन्छ नि त । दल खोलेर हामीसँग प्रतिस्पर्धामा आए हुन्छ । त्यो प्रतिस्पर्धाबाट जनताबाट अब्बल साबित भयो भने, आवधिक निर्वाचन प्रणाली लोकतन्त्रको सुन्दरता हो, हामी तयार छौँ ।’

साथै, प्रधानमन्त्री ओलीले बालेनलाई सहयोग नै गर्न चाहेको भन्दै बालेन भने ओलीविरुद्ध लगातार नेगेटिभ ढंगले प्रस्तुत भइरहेको उहाँको भनाइ छ ।

एमालेका कुनै पनि नेता, सांसदहरुले अपराध गर्छ भने उनीहरुलाई दण्डित गर्न कसैले नरोक्ने पनि उहाँले बताउनुभयो ।

‘ओलीजी र बालेन शाहको बीचमा कुनै त्यस्तो म देख्दिनँ । ओलीले उहाँलाई जहिले पनि हामी उहाँलाई सहयोग गर्छौँ भन्ने हिसाबबाटै कुरा राख्नुभएको छ । तर, बालेनजी लगाताररुपमा नेगेटिभ ढंगबाट प्रस्तुत हुनुभएको छ । प्रदेश सांसद रेखाजीको कुरा छ । उजुरी परेर प्रहरीले पक्राउ गर्ने प्रक्रिया किन थालेन ? एमालेले कहाँ बाधा गर्छ ?’ उहाँले प्रश्न गर्नुभयो ।

नेता पोखरेलले पहिलो पटक नेपालको इतिहासमा समृद्धि पनि हाम्रो राष्ट्रको एजेण्डा बन्छ भन्ने कुराको सुरुवात केपी ओलीबाट भएको दाबी गर्नुभयो । उहाँले आजको दिनसम्म समृद्ध नेपाल, खुसी नेपालीको सपना साकार पार्न ओली लागिरहेको दाबी गर्नुभयो ।

साथै, गौरा पर्वको अवसरमा टुँडिखेलमा आयोजित कार्यक्रमा प्रधानमन्त्री ओली र पूर्वप्रधानमन्त्रीसमेत रहेका नेपाली कांग्रेसका सभापति शेरबहादुर देउवामाथि युवाहरुले व्यक्त गरेको आक्रोशलाई उहाँले जे मन लाग्यो त्यहीँ मनपरी भएको बताउनुभयो । जे मन लाग्यो त्यो बोल्नेलाई कुनै पनि कारबाही नगर्ने लोकतन्त्र हुन नसक्ने उहाँको भनाइ छ ।

‘पञ्चायतकालमा विरोध गर्नेहरुले कति वर्ष जेल बस्नुपरेको थियो ? अहिले त खुला मञ्चको औपचारिक कार्यक्रममा प्रधानमन्त्रीको विरुद्धमा जे मन लाग्यो त्यो बोल्ने, जे मन लाग्यो त्यो बोल्नेलाई कुनै पनि कारबाही नगर्ने लोकतन्त्र हो ?’ उहाँले प्रश्न गर्नुभयो ।

साथै, उहाँले एमाले–कांग्रेससहितको सरकारको मूल मुद्दा सुशासन र समृद्धि रहेको बताउनुभयो । उहाँले जबरजस्ती रुपमा संविधान संशोधन नहुने पनि बताउनुभयो । राष्ट्रिय सहमति गरेर नै संविधान संशोधनको प्रयास गरिने उहाँको भनाइ छ ।

‘हामीले जबरजस्ती रुपमा संविधान संशोधन गर्न चाहेको छैनौँ । त्यसमा राष्ट्रिय सहमति गरेरै संविधान संशोधन हुन्छ । संविधान कुनै बाइबल, कुरान होइन, यो संशोधनीय दस्ताबेज हो । एउटा अवधिमा यसलाई संशोधन गरौँ भन्दा विभिन्न भ्रम पाल्न जरुरी छैन,’ उहाँले भन्नुभयो ।

साथै, भूकम्पका कारण लडेका संरचनाहरु उठाउने काम एमालेले गरेको उहाँको दाबी छ । झापाको भ्यू टावरलाई उहाँले ‘ट्रेड टावर’ को संज्ञा दिनुभयो । झापाको भ्यू टावरले भोलिका दिनमा राम्रो सन्देश दिने बताउनुभयो ।