माधव नेपाल भन्छन्-‘दासढुंगा घटनाको गम्भीर खोजी आवश्यक’
काठमाडौँ, ३ जेठ । नेकपा (एकीकृत समाजवादी)का अध्यक्ष माधवकुमार नेपालले दासढुंगा घटनाको गम्भीर खोजी आवश्यक भएको बताउनुभएको छ ।
बिहीबार मदन–आश्रितको ३१औँ स्मृति दिवसका अवसरमा पार्टी कार्यालय आलोकनगरमा आयोजित कार्यक्रममा नेपालले जननेता मदन भण्डारीको सत्यतथ्य बाहिर ल्याउन समिति गठन गरेपनि अझै सत्यतत्य आउन नसकेको बताउनुभयो ।
तत्कालीन समयमा भण्डारीको निधनले पार्टी पंक्तिमै निराशाले सताएको स्मरण गर्दै अध्यक्ष नेपालले भन्नुभयो, ‘घटनाको सन्दर्भमा सत्यतथ्य के हो अझै छानबिन गर्न बाँकी छ । तत्कालीन अवस्थामा पार्टीले तुरुन्त पहलकदमी लियो । त्यसपछि पद्मरत्न तुलाधरको नेतृत्वमा छानबिन कमिटी पनि बन्यो,’ उहाँले थप्नुभयो,‘त्यो छानबिन कमिटीको मात्रै रिर्पोटले पुगेन भनेर पार्टीले स्वयं केपी ओलीको नेतृत्वमा छानबिन कमिटी बनायो । त्यो कमिटीबाट कुनै खास कुराहरू आउन सकेन । त्यसैले यस सन्दर्भमा अझै गम्भीर खोजी गर्न आवश्यक छ ।’
अध्यक्ष नेपालले दुर्घटनाको अन्तिम साक्षी अमर लामाको समेत हत्या रहस्यम ढंगले भएको बताउँदै नेकपा (एमाले)ले त्यसको सत्यतथ्य छानबिन गर्न सहयोग गर्नुपर्ने बेला आएको घुमाउरो पारामा उहाँले भन्नुभयो,‘दुर्घटनाको अन्तिम साक्षी अमर लामालाई यो बीचमा मारियो । कीर्तिपुरमा गइरहेको बेला गोली हानेर मारियो । त्यो पनि रहस्यमय छ । कुनै पार्टीसँग जोडिएका मान्छेले उनलाई मारेको भन्ने कुरा आएको छ । सम्बन्धित पार्टीले पनि के भएको हो भन्ने बारेमा छानबिनमा सहयोग गर्नुपर्ने आवश्यकता छ ।’
यस्तै, सम्मानित नेता झलनाथ खनालले मदन–आश्रीतको दुर्घटना नभएर षड्यन्त्रपूर्ण हत्या भएको तर्क गर्नुभयो ।
‘हामी दुर्घटना, दुर्घटना, दुर्घटना मात्र भन्दै हिँडेका छौँ । ३० वर्ष भयो तर यथार्थमा भन्ने हो भने त्यो हत्या हो ।’ उहाँले मदन–आश्रितको ३१औँ स्मृतिमा आफूले घटनाबारे सत्यतथ्य बताउने भन्दै थप्नुभयो, ‘पाखा बाटोमा खनिएको बाटोमा मुग्लिनबाट नारायणघाटतिर गुडिरहेको गाडी भित्तातिरबाट हिँड्छ । त्यो गाडी कसरी दाहिनेतिर भएको खोलामा खस्छ ? षड्यन्त्रपूर्ण ढंगले गाडी खसाइएको हो । षड्यन्त्रपूर्वक रुपले मारिएको घटना हो । घटनाको प्रकृतिले त्यो कुरा पुष्टि गर्छ ।’