सहुलीयत ऋणको व्यवस्था भए कृषि क्षेत्रमा क्रान्ति आउँछ : मन्त्री साह

काठमाडौँ, २७ वैशाख । कृषि तथा पशुपन्छी विकासमन्त्री ज्वाला कुमारी शाहले नेपालमा लेखापरीक्षणको पारदर्शिता हुनु अत्यन्तै आवश्यक भएको बताउनुभएको छ ।

उहाँले कृषि क्षेत्र अघि बढेमात्रै देशमा समृद्धि आउने भन्दै सरकारले कम्तीमा १५ वर्ष सम्मको सहुलीयत ऋण दिने व्यवस्था मिलाउन सके कृषि क्रान्ति हुने धारणा राख्नुभयो ।

कृषि उत्पादन बढाउनुपर्नेमा जोड दिएकी उहाँले सबैलाई यो क्षेत्रको विकासमा ध्यान दिन आग्रह गर्दै भन्नुभयो, ‘कृषि क्षेत्र अगाडि बढेमात्र देश समृद्धितिर जान्छ । कृषि क्षेत्रलाई विशेष ध्यानमा राख्दै कम्तिमा १२ देखि १५ वर्षसम्मका लागि सहुलीयत ऋण हामीले दिन सक्यौँ भने कृषिमा एउटा नयाँ क्रान्ति आउनेछ ।’

बिहीबार काठमाडौँमा आयोजित आर्थिक सम्भावना बढाउन संकटसम्बन्धी राष्ट्रिय सम्मेलनमा सम्बोधन गर्दै उहाँले कृषि क्षेत्रको विकास र उत्पादकत्व वृद्धि गर्नुपर्नेमा जोड दिनुभयो । यस्तै, मन्त्री साहले देशको हरेक आर्थिक क्रियाकलापको लेखा परीक्षण पारदर्शी रुपमा गरिनुपर्नेमा जोड दिनुभयो ।

नेपाल चार्टर्ड एकाउन्टेन्ट संघ (आइक्यान)को कार्यक्रममा मन्त्री ज्वालाले भन्नुभयो, ‘ आफ्नो देशभित्रको आर्थिक क्रियाकलापसँगै अन्तरदेशीय आर्थिक क्रियाकलापको समेत लेखापरीक्षण गर्दै आएको नेपालस्तो देशमा स्पष्ट लेखा परीक्षण हुनु अत्यन्तै जरुरी छ ।’ उहाँले थप्नुभयो, ‘स्पष्ट लेखा परीक्षणबाट बनेका सम्बन्धमा सुदृढ हुने र नविन सम्बन्धहरु स्थापित गर्न राम्रो वातावरण तयार हुने गरेको छ ।’

विभिन्न कम्पनी र संस्था, व्यक्ति र सरकारी निकायका आर्थिक लागत (आय व्यय)को हिसावलाई पारदर्शी र जवाफदेही बनाउन चाटर्ड एकाउन्टेन्टको क्षेत्रमा दक्ष जनशक्तिको आवश्यकता र भूमिका महत्वपूर्ण हुने धारणा मन्त्री साहको छ ।

यस्तै, उनले लेखा व्यवसायीको नियामक निकाय नेपाल चार्टर्ड एकाउन्टेन्ट संघले देशको वित्तीय सुुशासनमा लेखा परीक्षणको माध्यमबाट योगदान दिँदै आएको बताउनुभयो । चार्टर्ड एकाउन्टेन्टहरु पलायन हुने समस्यालाई आफूले मनन गरेको मन्त्री ज्यालाले जिकिर गर्नुभयो ।