सत्याग्रहमा बसेका डा.केसीलाई कृष्ण मन्दिरको धर्मशाला छाड्न समितिको पत्र
धनगढी, ८ साउन । स्वास्थ्य क्षेत्रको सुधारका लागि सात बुँदे माग राखेर सत्याग्र थालेका डा.गोविन्द केसीलाई सकस परेको छ ।
धनगढी स्थित कृष्ण मन्दिरको धर्मशालामा बिहीबारदेखि सत्याग्रह बसेका केसीलाई मन्दिर व्यवस्थापन समितिले ठाउँ छाड्न पत्र पठाएपछि केसी अफ्ठयारोमा परेका हुन् ।
मन्दिर व्यवस्थापन समितिको पत्रपछि अब के गर्ने भन्ने विषयमा छलफल भइरहेको उहाँका सहयोगी डा.अमृत जैसीले बताउनुभयो ।
“डा.केसीले व्यवस्थापन समितिको अनुमति लगेरै सत्याग्र सुरू गरेका हुन्, यसअघि पनि यही स्थानमा बसेर केसीले दुईपटक सत्याग्रह सुरू गर्नुभएकै हो,” जैसीले भन्नुभयो, “तर, अहिले धर्मशाला छाड्न भन्दै पत्र आएको छ, यो राम्रो त हैन, अब के गर्ने भन्ने विषयमा छलफल भइरहेको छ ।”
धर्मशाला व्यवस्थापन समितिका अध्यक्ष मुक्तिनाथ पन्तले केसीले भने कोठामा बस्ने भनेर जानकारी दिए पनि केसीले सत्याग्र सुरू गरेको बताउनुभयो । यस विषयमा मन्दिर व्यवस्थापन समितिलाई जानकारी नभएको पन्तको भनाइ छ ।
धार्मिक संस्थामा अनसन बस्न किन दिएको भनेर दबाब आउन थालेपछि ठाउँ छाड्न पत्र पठाएको पन्तले बताउनुभयो ।
डाक्टर केसीले सुदूरपश्चिम स्थित कैलालीको गेटामा बन्न लागेको सहिद दशरथचन्द स्वास्थ विज्ञान विश्वविद्यालयमा अवरोध सिर्जना गर्न खोजेको यहाँका नागरिकको आरोप छ ।
केसीले त्यहाँका उपकुलति र रजिस्ट्रारको नियुक्ति खारेज गर्नुपर्ने पहिलो माग सहित सत्याग्रह सुरू गर्नुभएको हो ।