जुटको बोरामा बेरेर गाडिएको अवस्थामा भेटियो गुलशना खातुनको शव
- राहुल राय
सिरहा, १२ चैत । गत फागुन २९ गते हराएकी १३ वर्षीया गुलशना खातुनको शव बोरामा बेरेर गाडिएको अवस्थामा फेला परेको छ । गोलबजार नगरपालिका–९ गोविन्दपुर गाउँकी बालिका गुलशना गत २९ गते फागुन बिहान ९ बजे घर बाहिर निस्केकी थिइन् । त्यसपछि उनी फर्किनन् ।
मंगलबार बिहान गोठालाहरु झाडी बुट्यान छेउछाउबाट गन्ध चलेको चर्चा भएपछि स्थानीयले इलाका प्रहरी कार्यालय मिर्चैयालाई खबर गरेका थिए ।
गोलबजार ९ का पूर्ववडाध्यक्ष रामपुकार कामतीले भन्नुभयो,‘एकातिर गाउँमा बालिका हराइरहेको खबर डढेलो झैं फैलिएको थियो । अर्कोतिर वनमारा झाडीभित्रबाट लास कुहिएको गन्ध आएपछि गाउँमा आशंका जाग्यो । दुर्भाग्यवश आशंका सत्यमा परिणत भयो । १३ वर्षीया गुलशना बोरामा बेरिएर खाडलभित्र मृत अवस्थामा फेला परिन् ।’
घटनास्थल पुगेका प्रहरीले घुर्मी खोला किनारमा तीन फिट खनेपछि जुटको बोरामा बेरिएको बालिकाको शब फेला परेको प्रहरी उपरीक्षक सन्त बहादुर बाखुले जानकारी दिनुभयो ।
उहाँले भन्नुभयो,‘लास पुरै कुहिएर चिन्न नसकिने अवस्थामा छ । कपडा र बाँकी रहेको शरीरको आकृतिबाट हराइरहेकी बालिका नै हुनुपर्छ भन्ने अनुमान लगाइएको छ । प्रहरीले बालिकाको शव पोष्टमार्टमका लागि सिरहा अस्पतालमा पठाउने तयारी गरेको छ । अपराधीले लास छिटो गलोस् भनेर खाडलमा नुन हालेर शव गाडेको फेला परेको छ ।’
फागुन २९ गते हराएकी गुलशनाको खोजी गरिदिन उनकी आमा जाहेदा खातुनले इलाका प्रहरी कार्यालय मिर्चैयामा गत चैत १ गते निवेदन दिनुभएको थियो । सात दिन बितिसक्दा पनि छोरीको अत्तोपत्तो नलागेपछि अत्तालिएकी जाहेदाले पत्रकार बोलाएर लेखिदिन आग्रह गर्नुभएको थियो । खातुनले प्रहरीले हराएकी छोरीको खोजी गर्न उदासिनता देखाएको आरोप लगाउनुभएको थियो ।
गत चैत ६ गते इलाका प्रहरी कार्यालय मिर्चैयाका प्रहरी नायब उपरीक्षक बाखुसँग गुलशनाको खोजीबारे जिज्ञासा राख्दा उहाँले भन्नुभएको थियो, ‘गुलशनालाई छिमेकी जिल्लामा पुर्याइएको सुरागी आएको छ । हामी निकै नजिक पुगिसकेका छौँ । चाडै बालिकाको उद्धार गर्छौ ।’ तर, दुर्भाग्यवश बालिकाको जीवित उद्धार गर्न प्रहरी असफल भएको छ ।
बालिका मृत भेटिएपछि नायब प्रहरी उपरीक्षकसँग सोधियो,‘चाडै उद्धार गर्छौँ भन्नुभएको थियो । बालिकाको सडेगलेको शरीर फेला पर्यो त ?’ उहाँले उत्तर दिनुहुँदै भन्नुभयो,‘एक व्यक्तिले हामीलाई बालिका धनुषामा देखिएको सूचना दिएका थिए । पछि उनलाई बोलाएर बालिकाको तस्बिर पनि देखाएर सोध्दा,‘ हो–मैले यही बालिकालाई एउटा केटासँग धनुषामा देखेको बताएका थिए ।’
‘हामीले रौतहटसम्म घेराबन्दी गरेका थियौँ । तर, सूचना गलत निस्क्यो,’ उहाँले भन्नुभयो । प्रहरी नायब उपरीक्षक बाखुले अब अनुसन्धान कुनै कसर बाँकी नराख्ने र अपराधी पत्ता लगाएरै छोड्ने बताउनुभयो ।
छोरीको लाश फेला परेको खबरले आमा जाहेदा खातुन र उनका परिवार स्तब्ध छन् । आमा जहेदा इन्तु न चिन्तु भएकी छिन् । गोबिन्दपुर गाउँ नै शोकाकुल भएको छ ।
उहाँले प्रहरीले आफू र आफ्नो परिवारलाई गुम्राहमा राखेको आरोप लगाउनुभयो । उहाँले भन्नुभयो,‘बालिका भेटिसकिएको छ । चाँडै घर ल्याइदिन्छौँ भनेर आश्वासन दिएका थिए । तर, अहिले सग्लो लाश पनि दिन सकेनन् ।’ प्रहरीले बालिकाको खोजीमा मेहनत गरेको भए आफ्नी छोरी जीवितै भेटिन्थ्यो भन्दै उहाँले प्रहरीले वास्तै नगरेको आरोप लगाउनुभयो ।
मृत गुलशना खातुन स्थानीय सामुदायिक विद्यालयमा कक्षा ४ मा अध्ययनरत थिइन् । त्यसअघि उनी स्थानीय मदर्सामा पढ्थिन् । -नेपाल न्यूज बैंक