भारतले जित्यो च्याम्पियन्स ट्रफीको उपाधि
काठमाडौँ, २६ फागुन । भारतले तेस्रो पटक च्याम्पियन्स ट्रफीको उपाधि जितेको छ । आइतबार भएको फाइनलमा न्युजिल्याण्डलाई चार विकेटले हराउँदै भारतले उपाधि जितेको हो ।
न्युजिल्याण्डले दिएको २५२ रनको लक्ष्य भारतले ४९ ओभरमा ६ विकेट गुमाएर पूरा गर्यो । भारतका लागि कप्तान रोहित शर्माले सर्वाधिक ७६ रन बनाए । ८३ बलको सामना गरेका उनले सात चौका र तीन छक्का प्रहार गरे ।
त्यस्तै, श्रेयस अय्यरले ४८, केएल राउलले ३४ रन बनाए । शुभमन गिलले ३१ रन बनाउँदा विराट कोहली एक रनमा आउट भए ।
न्युजिलाण्डले फाइनल खेलमा सात जना बलर प्रयोग गरेको थियो । जसमध्ये मिचेल सेन्टनर र माइकल ब्रेसवेलले समान दुई विकेट लिए ।
त्यसअघि टस जितेर पहिला ब्याटिङ गरेको न्युजिल्याण्डले ५० ओभरमा ७ विकेट गुमाउदै २५१ रन बनाएको थियो ।
यसअघि सन् २०१३ पनि भारतले यो प्रतियोगिताको उपाधि जितेको थियो । त्यस्तै, सन् २००२ मा वर्षाका कारण खेल रद्द हुँदा श्रीलंका र भारतले संयुक्त रुपमा उपाधि जितेको थिए ।
यस अघि सन् २००० च्याम्पियन्स ट्रफी जितेके न्युजिल्याण्ड भने दोस्रो पटक उपविजेता बनेको छ ।