बागमती खोलामा भासिएको पुलको मर्मत सम्पन्न
रौतहट, ११ फागुन । रौतहट र सर्लाहीलाई जोड्ने बागमती खोलामा भासिएको पुलको मर्मत कार्य सकिएको छ । सर्लाहीबाट आउँदा पाँच नम्बर रौतहटबाट जाँदा सात नम्बरको स्पर करिब ८ सेन्टिमिटरको भासिएको थियो ।
पुलको ‘ब्यारिङ प्याडेस्टल’ मा क्षति पुगी केही भागमा ढलान उप्किएको अवस्थामा मर्मत गरिएको सडक डिभिजन कार्यालय चन्द्रनिगाहपुरका इन्जिनियर गिरिसनन्दनप्रसाद तोरसले बताउनुभयो ।
उहाँका अनुसार पुल सञ्चालन भएसँगै अब डाइभर्सन भत्काएर त्यहाँ हालिएका ह्यूमपाइप निकाल्ने तयारी भइरहेको छ । पुल मर्मतको काम करीब एक सातापछि सकिएको उहाँको भनाइ छ ।
पुलको मर्मत कार्य गर्न भन्दै माघ २७ गतेदेखि पुलबाट सवारी साधन सञ्चालनमा रोक लगाइ डाइभर्सनबाट बागमती खोला वारपार गर्ने व्यवस्था मिलाइएको थियो ।
पुलमा आधुनिक प्रविधिबाट उच्च गुणस्तरको ‘कङ्क्रिट’ हालेर ढलान गरिएकाले तत्काल सवारी साधन सञ्चालन गर्न मिल्ने भएको सडकका प्राविधिकले बताएका छन् ।
तत्कालीन सोभियत संघ सरकारको आर्थीक सहयोगमा ५० वर्षअघि निर्माण गरिएको जनाइएको छ । अब पूर्व–पश्चिम राजमार्ग विस्तारका क्रममा यी पुलसँगै अर्को समानान्तर पुल निर्माण गर्ने तयारी गरिएको सडक डिभिजन कार्यालय चन्द्रनिगाहपुरले जनाएको छ ।