मापदण्ड पूरा गरेन भनेर अस्पताल नै बन्द गर्न सम्भव छैन : मन्त्री पौडेल [भिडिओ]
काठमाडौँ, २१ भदौ । स्वास्थ्य तथा जनसङ्ख्यामन्त्री प्रदीप पौडेलले कुनैपनि निजी अस्पतालले मापदण्ड पूरा गरेन भनेर अस्पताल नै बन्द गर्न सम्भव नरहेको बताउनुभएको छ ।
शुक्रबार काठमाडौँमा आयोजित एसोसिएसन अफ प्राइभेट हेल्थ इन्स्टिच्युसन अफ नेपाल (अफिन)को २६औँ वार्षिकोत्सवको अवसरमा आयोजित कार्यक्रममा उहाँले निजी क्षेत्रको ठुलो उपस्थिति रहेको भन्दै मापदण्ड पूरा गरेन भनेर अब अस्पताल नै बन्द गर्न सम्भव नरहेको बताउनुभयो ।
पहिला सरकारले स्वीकृति दिँदा मापदण्डका बारेमा कडा हुन नसकेको र अहिले यहाँसम्म आइपुग्दा कडा हुन खोजेर सम्भव नहुने बताउनुभयो ।
उहाँले भन्नुभयो,‘निजी क्षेत्रको सबै सेक्टरमा महत्वपूर्ण योगदान छ । स्वास्थ्यको दायरा बढाउन, सञ्चार एवम् बैंकहहरुको दायरा बढाउने काम निजीले नै गरेका हुन् । नीतिगत रुपमा नेपाली कांग्रेसले नै यसलाई प्रवेश गराएको हो । यसको ठुलो उपस्थिति छ । कुनै अस्पतालले मापदण्ड पूरा गरेन, जग्गा पुगेन, भवन पुगेन भनेर अब अस्पताल बन्द हुन सक्छ ? सक्दैन । पहिला स्वीकृति पनि त सरकारले नै दिएको हो । पहिले स्वीकृति दिँदा मापदण्डका बारेमा कडा हुन नसक्ने अहिले चलेर यहाँसम्म आयो अब कडा हुन खोजेर सम्भव छैन ।’
उहाँले निजी क्षेत्रको लक्ष्य पनि नागरिकलाई सेवा सुविधा दिने नै रहेको भन्दै यस क्षेत्रलाई बाँध्ने भन्दा पनि खुकुलो छाडेर लगानीको दायरा बढाउनुपर्ने धारणा राख्नुभयो । मन्त्री पौडेलले नेपालमा गुणस्तरहीन स्वास्थ्य भन्ने भाष्य निर्माण भएको भन्दै स्वास्थ्य कहिल्यै गुणस्तरहीन नहुने बताउनुभयो ।