‘द्वन्द्व पीडित महिलाहरुले अनुहार छोपेर हिँड्नु पर्ने अवस्थाको अन्त्य होस्’ [भिडिओ]
काठमाडौँ, २६ साउन । नेकपा (माओवादी केन्द्र)की नेतृ देवी खड्काले सङ्क्रमणकालीन न्यायसम्बन्धी (टिआरसी) विधेयक पीडितमैत्री भएको बताउनुभएको छ ।
शनिबार काठमाडौँमा आयोजित ‘टिआरसी विधेयकमा भएको ऐतिहासिक उपलब्धि ऐन कार्यान्वयनमा द्वन्द्व पीडितहरुको सहभागिता’ विषयक अन्तरक्रियामा बोल्दै नेतृ खड्काले राजनीतिक रुपमा सहमति भएर अघि बढेको विधेयकले पीडितको घाउमा मल्हम लगाउने उल्लेख गर्दै समाज परिवर्तनको प्रक्रियामा इँट्टा थप्ने काम गरेको बताउनुभयो ।
उहाँले भन्नुभयो, ‘अहिलेको टिआरसीसम्बन्धी विधेयक संशोधन गर्ने कार्यदलले दिएको प्रस्तावमा गम्भीर मानव उल्लंघनका घटनाहरुमा जबरजस्तीकरणी र बलात्कारका घटनाहरुलाई पनि समावेश गरिदिनुभएको छ । सजाय छुट गर्ने सन्दर्भमा गम्भीर यौनजन्य हिंसाको हकमा लागु हुने छैन भन्ने कुरा राखिदिनुभयो । महिलामाथि हुने हिंसाको मात्रै घटना होइन, सामाजिक परिवेश, पितृसत्तात्मक सोच र मूल्य मान्यताको विरुद्ध कसरी लड्ने र समाज परिवर्तनको पाइलामा इँट्टा थप्ने काम दस्तावेजले गरेको छ । द्वन्द्वपीडितको घाउमा मल्हम लगाउने प्रस्ताव त्यस दस्तावेजमा समावेश गरिएको छ । यसलाई पारित गरिदिन हार्दिक अनुरोध गर्न चाहान्छौँ ।’
आफूहरु टिआरसीसम्बन्धी विधेयक अगाडि बढाउन लामो समयदेखि संघर्ष गरिरहेको उल्लेख गर्दै उहाँले अब द्वन्द्व पीडित महिलाहरुले अनुहार छोपेर हिँड्नुपर्ने अवस्थाको अन्त्य हुने विश्वास व्यक्त गर्नुभयो ।
‘अब घटनामा परेर पीडित हुने महिलाहरुले अनुहार छोपेर हिँड्नु पर्दैन । पीडकहरुले अनुहार लुकाउन नपरे पनि छलेर हिँड्नु पर्ने अवस्था आयो भने समाज ठिक ठाउँमा पुग्छ । दस्तावेज संसद्बाट पास भएपछि आयोग स्थापना हुनेछ र उजुरी दर्ता हुन सुरु हुनेछ,’ उहाँको भनाइ छ ।