गालीको राजनीतिले अन्योलता ल्यायो : उपसभापति गुरुङ [भिडिओ]
काठमाडौँ, २१ वैशाख । नेपाली कांग्रेसका उपसभापति धनराज गुरुङले नेपाली राजनीतिमा एकले अर्कालाई गाली गर्ने प्रवृत्ति बढ्दा राजनीति अनुशासन अन्योलग्रस्त अवस्थामा पुगेको बताउनुभएको छ ।
शुक्रबार काठमाडौँमा आयोजित कांग्रेस निकट लोकतान्त्रिक खेलकुद संघको १०औँ स्थापना दिवस विशेष कार्यक्रममा नेता गुरुङले गालीको राजनीतिले अन्यौंलता सिर्जना गरेको भन्दै खेलकुदमा जस्तै नेपाली राजनीतिमा पनि अनुशासन कायम नगरे अवस्था गम्भीर हुनसक्ने बताउनुभयो ।
‘खेलकुद भित्रको अनुशासन जस्तै गरेर नेपाली राजनीतिमा पनि अनुशासन कायम गर्नुपर्दछ । नेपाली राजनीतिमा देखिएको समस्या अनुशासनविहीन छ । मञ्च पाउनै नहुने एक नेताले अर्को नेतालाई खुइल्याउने, भरपूर गालीमात्रै गर्ने, गालीको राजनीतिले हामी अन्यौंलग्रस्त छौँ,’ गुरुङले थप्नुभयो, ‘यसले अहिलेको राजनीति गम्भीर मोडमा पुगेको जस्तो लाग्छ ।’
उहाँले राजनीतिमा निराशाको खेती भइरहेको र त्यसलाई आशामा बदल्ने जिम्मेवारी पूरा गर्न कांग्रेसले मात्रै नेतृत्वदायी भूमिका निर्वाह गर्न सक्ने जिकिर पनि गर्नुभयो ।
उहाँले राजनीतिक नेतृत्वले खेलकुद क्षेत्रलाई उपेक्षामा राखेर फेरि त्यही क्षेत्रबाट खेलाडीले गोल्ड मेडल ल्याओस् भनेर आशा गर्न नहुने भन्दै खेल क्षेत्रको विकासमा जोड दिनुभयो ।
‘खेलकुदमा गोल्ड मेडल ल्याइदिए हुन्थ्यो भनेर खेलाडीबाट आशा राख्ने तर खेलकुद क्षेत्रलाई उपेक्षा गरेर गोल्ड मेडल ल्याउन सकिँदैन । यसलाई केन्द्रमा राखेर हामीले काम गर्नुपर्छ,’ गुरुङले भन्नुभयो ।