धरानबाट अत्याधुनिक पेस्तोलसहित दुईजना पक्राउ

13

धरान, ८ जेठ । धरानमा अत्याधुनिक हतियारको कारोबार गर्ने थप दुई जनालाई धरान प्रहरीले पक्राउ परेको छ । प्रहरीले अत्याधुनिक युएसए लेखिएको एक थान पेस्तोल र म्याग्जिन बरामत गरेको छ ।

कोशी प्रदेश प्रहरी कार्यालय अनुसन्धान समूहका प्रहरी नायब निरीक्षक रूद्र खड्का र इलाका प्रहरी कार्यालय धरानका डिएसपी नवराज मल्लको संयुक्त टोलीले धरान–१० का ३५ वर्षीय राजेश लिम्बू र धरान–५ का कुमार भण्डारीलाई पक्राउ गरेको हो ।

उनीहरूले धरान–८ को जनता ग्यारेजमा अत्याधुनिक पेस्तोल लुकाइ राखेको भन्ने विशेष सुराकीको आधारमा छापा मार्दा पेस्तोलसहित दुई जनालाई नियन्त्रणमा लिएको डिएसपी मल्लले बताए ।

प्रहरीले केहीदिन अगाडि पनि धरान–१७ का हुकमेन जिमी, दीपक जिमी र रोहित राईलाई दुई थान पेस्तोलसहित पक्राउ गरेको थियो ।

हतियारसहित पक्राउ परेका पाँचै जनालाई हातहतियार खरखजनासम्बन्धी कसुरअन्तर्गत जिल्ला अदालत सुनसरीबाट १० दिनको म्याद थप गरी अनुसन्धान थालिएको प्रहरीले जनाएको छ ।

नेपाल–भारत खुला सिमानाको मौका छोपी हतियार कारोबारीहरूले अत्याधुनिक हतियार धरानसम्म ल्याएर बिक्री गर्ने गरेको प्रहरीले बताएको छ ।

Share This:
सम्बन्धित खबर
Loading...