प्रतिनिधिसभा बैठक पुस ६ सम्मलाई स्थगित
काठमाडौँ । संघीय संसद्को हिउँदे अधिवेशनको पहिलो बैठकमा प्रमुख प्रतिपक्षी नेकपा (एमाले)का सांसदहरुले विरोध गरेका छन् ।
बैठक सुरु हुनेबितिकै एमालेका सांसदहरुले नारावाजी गर्दै रोष्टम घेराउ गरेका हुन् । सभामुखले राष्ट्रपतिबाट प्राप्त अधिवेशन आह्वानसम्बन्धी पत्रको व्यहोरा सुनाउने बित्तिकै एमालेका सांसद्हरुले विरोध सुरु गरेका थिए ।
एमालेका सांसद्हरूले नेकपा एमालेले पार्टीबाट निष्कासन गरेका सांसद्लाई सभामुखले नहटाएको नारावाजी पनि गरेका थिए । उनीहरूले गैरसांसद राखेर संसद् चल्न नसक्ने बताएका छन् । संसद्मा विरोध भएपछि सभामुख अग्नि सापकोटाले जनप्रतिनिधिको सर्वोच्च निकाय संसद्लाई जिम्मेवार भएर अघि बढाउन आग्रह गरे । उनले सभालाई सुव्यवस्थित तरिकाले सञ्चालनका लागि पटक–पटक आसन ग्रहण गर्न आग्रह गरेपनि एमाले सांसद्हरुले विरोध जारी राखेपछि कार्यसूचीलाई अघि बढाएका थिए ।
बैठकमा गृहमन्त्री बालकृष्ण खाणका तर्फतबाट कानुनमन्त्री दिलेन्द्र बडुले नेपाल प्रहरी र प्रदेश प्रहरी (कार्य सञ्चालन, सुपरिवेक्षण र समन्वय) पहिलो संशोधन अध्यादेश २०७८, तेजाब तथा अन्य घातक रसायनिक पदार्थ (नियमन) अध्यादेश र सामाजिक सुरक्षा पहिलो संशोधन अध्यादेश पेस गरे ।
त्यस्तै, कानुनमन्त्री बडुले भौतिक पूर्वाधार तथा संसदीय मामिला मन्त्री रेनुकुमारी यादवका तर्फबाट रेल्वे अध्यादेश पेस गरे भने यौन हिंसाविरुद्धका केही ऐनलाई संशोधन गर्ने अध्यादेश र फौजदारी कार्यविधि सम्बन्धी अध्यादेश पेस गरेका थिए ।
प्रतिनिधिसभाको अर्को बैठक पुष ६ गते बोलाइएको छ ।