चालक निदाउँदा स्कारपियो ३० मिटर तल खस्यो, ४ जना घाइते
मकवानपुर, ९ फागुन । बागमती प्रदेशअन्तर्गत मकवानपुरको इन्द्रसरोवर गाउँपालिका–२ सुकौरा बेसीस्थित कुलेखानी–फाखेल–काठमाडौँ सडकखण्डमा स्कारपियो दुर्घटना हुँदा चार जना घाइते भएका छन् ।
प्रहरीका अनुसार २०८२ साल फागुन ९ गते बिहान करिब ६ बजे वीरगञ्जबाट काठमाडौँतर्फ जाँदै गरेको ना४च ९७७७ नम्बरको स्कारपियो चालक निदाउँदा अनियन्त्रित भइ सडकबाट करिब ३० मिटर तल शाखा बाटोमा खसेको थियो ।
दुर्घटनाको खबर बिहान ६ः३० बजे प्राप्त हुनासाथ प्रहरी चौकी फाखेलबाट प्रहरी सहायक निरीक्षक कमल खत्रीको कमाण्डमा पाँच जनाको टोली घटनास्थल पुगेर उद्धार कार्य गरेको थियो । स्थानीयवासीको सहयोगमा घाइतेहरूलाई उद्धार गरी एम्बुलेन्समार्फत उपचारका लागि काठमाडौँ पठाइएको प्रहरीले जनाएको छ । दुर्घटनाग्रस्त स्कारपियो भने घटनास्थलमै रहेको छ ।
स्कारपियो चालक कलैया–२ बस्ने करिब ३८ वर्षीय विजय यादव, सवारीधनी बरेवा–७ बस्ने करिब ५० वर्षीय सन्तोष कुमार गुप्ता, उनकी श्रीमती करिब ४० वर्षीया शोभा गुप्ता, छोरा करिब १६ वर्षीय अनमोल गुप्ता घाइते भएका छन् ।
प्रहरीका अनुसार शोभा गुप्ताको कम्मर र टाउकोमा चोट लाग्दा अवस्था गम्भीर रहेको छ । दुर्घटनाबारे थप अनुसन्धान भइरहेको प्रहरीले जनाएको छ ।