एमाले अपराधीलाई बचान लाग्दैन : पूर्वमन्त्री पण्डित
काठमाडौँ, ७ पुस । नेकपा (एमाले)का स्थायी कमिटी सदस्य एवम् पूर्वमन्त्री लालबाबु पण्डितले नेकपा (एमाले) अपराधीलाई बचाउन नलाग्ने बताउनुभएको छ ।
गाउँपालिका तथा नगरपालिकाहरूमा निर्वाचित जनप्रतिनिधिहरूले कानुनको अधिनमा रहेर पदीय जिम्मेवारी पूरा गर्नुपर्ने भन्दै उहाँले कानुनबाहिर गएर काम गर्ने जो कसैलाई पनि बचाउन पार्टी नलाग्ने बताउनुभयो ।
नेकपा (एमाले) दोलखा–काठमाडौँ सम्पर्क मञ्चले शनिबार काठमाडौँमा आयोजना गरेको ‘बधाई, शुभकामना तथा मतदाताहरूलाई धन्यवाद’ कार्यक्रमलाई सम्बोधन गर्नुहुँदै पूर्वमन्त्री पण्डितले भन्नुभयो, ‘जनप्रतिनिधि हुँ भन्दैमा जथाभावी काम गर्न पाइँदैन । यदि तपाईंले कानुन भन्दाबाहिर गएर काम गर्नुभयो भने तपाईंलाई बचाउन एमाले पार्टी लाग्दैन । किनकी एमाले अपराधीको संरक्षण गर्ने पार्टी होइन ।’ कम्तिमा एमालेबाट निर्वाचित जनप्रतिनिधिले कानुनको परिधिमा रहेर पार्टीको समेत सल्लाह लिएर जनतामुखी काम गर्नुपर्ने उहाँको भनाइ थियो ।
एमाले केन्द्रीय सम्पर्क समन्वय कमिटीका इञ्चार्ज समेत रहनुभएका नेता पण्डितले पार्टीका नेता तथा कार्यकर्ताहरूले के गर्नुपर्छ भन्ने कुरा भुसुक्कै बिर्सेर के पाएँ भनेर सधैँ प्रश्न गर्ने प्रवृत्ति समेत त्याग्नुपर्ने बताउनुभयो ।
‘हामीले व्यक्तिका निम्ति होइन पार्टीका निम्ति काम गर्नुपर्छ, जब पार्टीका निम्ति काम गर्नुहुन्छ व्यक्तिगत लाभ स्वतः प्राप्त हुन्छ,’ उहाँले भन्नुभयो, ‘त्यसकारण म भन्छु, आफूले के गर्नुपर्छ भन्ने कुरा बिर्सिएर के पाएँ भन्ने मात्रै गर्नुहुँदैन ।’
उहाँले जनभावनाका साथै उम्मेदवार हुँदा जसरी सबै नेता कार्यकर्ता चाहियो जितपछि जनप्रतिनिधिले उनीहरूको भावना समेटेर अघि बढ्नुपर्नेमा जोड दिनुभयो । अरुलाई कैची चलाउँदा भोलि आफूमाथि पनि चल्न सक्छ भन्ने हेक्का राखेर नेताहरू एकढिक्का भएर अघि बढ्नुपर्ने सुझाव पनि उहाँले दिनुभयो ।
दोलखाको गौरीशंकर गाउँपालिकामा गत मंसिर १६ गते भएको उपनिर्वाचनमा एमालेको तर्फबाट निर्वाचित उपाध्यक्ष उमा लुङ्गेली मगर शेर्पालाई बधाई, शुभकामना तथा मतदाताहरूलाई धन्यवाद दिन सम्पर्क मञ्चले कार्यक्रम आयोजना गरेको थियो । कार्यक्रममा एमाले पोलिटब्युरो सदस्य तथा दोलखा इञ्चार्ज पूर्वमन्त्री पार्वत गुरुङ, पार्टी केन्द्रीय सदस्य एवम् बागमती प्रदेश सम्पर्क कमिटीकी इञ्चार्ज पूर्वमन्त्री सरस्वती बस्नेत, केन्द्रीय सम्पर्क समन्वय समितिका संयोजक श्याम कुमार बस्नेत, केन्द्रीय लेखा आयोग सदस्य शान्ति पाख्रिनलगायत विभिन्न कमिटीमा रहेका दोलखाली नेताहरूको उपस्थिति रहेको दोलखा–काठमाडौँ सम्पर्क मञ्चका उपाध्यक्ष रिखी बुढाथोकीले जानकारी दिनुभयो ।