कसैको दबाब र चाहनामा मुद्दा चल्दैन : गृहमन्त्री लेखक
काठमाडौँ, १७ साउन । गृहमन्त्री रमेश लेखकले लोकतान्त्रिक शासन व्यवस्थाको सुदृढीकरणका लागि अनिवार्य सर्त रहेको सुशासन र यसको प्रवर्द्धन गर्न ‘राष्ट्रिय सदाचार नीति’ जारी गर्न सरकार प्रतिवद्ध रहेको बताउनुभएको छ।
बिहीबार सिंहदरबारमा बसेको विकास, आर्थिक मामिला तथा सुशासन समितिको बैठकमा सांसदहरुले राखेका जिज्ञासाहरुको जवाफ दिँदै गृहमन्त्री लेखकले सदाचार नीति जारी गर्न ढिला भइसकेको उल्लेख गर्दै सरकारलाई नीति पारित गरी जारी गर्नका लागि समितिबाट सुझावको आवश्यकता रहेको बताउनुभयो ।
उहाँले भन्नुभयो, ‘सदाचार भनेको मानिसलाई भित्रबाट राम्रो गर्नका लागि उत्प्रेरित गर्ने विषय हो । त्यसैले व्यक्तिको प्रक्रियालाई ठिक गर्नका लागि ल्याउन आवश्यक रहेको नीति हो सदाचार नीति । यो आवश्यक छ, जरुरी छ र सरकार नीतिलाई पारित गरी लागु गर्नका लागि प्रतिवद्ध छ । ढिलो भएको भएपनि पारित गरी लागु गर्नका लागि प्रतिवद्धता जनाउन चाहन्छु । यसका लागि सम्मानित समितिबाट सुझाव सल्लाहदेखि सबै कुरा होस् भन्न चाहन्छु ।’
भ्रष्टाचारको फाइल खोल्नुपर्ने भन्दै चौतर्फी दबाब आइरहेको उल्लेख गर्दै गृहमन्त्री लेखकले कानुनअनुसार अघि बढ्ने बताउनुभयो । फाइल खोल्नु भनेको मुद्दा अगाडि बढाउनु रहेको बताउँदै उहाँले कसैको चाहना र रहरले मुद्दा नचल्ने बताउनुभयो ।
‘फाइल खोल्ने भनेको मुद्दा चलाउने होला नि । फाइल खोलेर यी यता छ भनेर देखाउने त होइन होला । अनि लोकतन्त्रमा मुद्दा कानुन बेगर चल्छ ? कसैप्रति रिस उठ्यो भन्दैमा मुद्दा चलाइदिने त ? कसैका चाहना र रहरले मुद्दा चल्दैन,’ उहाँको भनाइ छ ।