सिक्किममा बेपत्ता भएका ५ नेपाली ११ दिनपछि सम्पर्कमा आए
इलाम, २८ असोज । भारतको सिक्किममा गएको पहिरो तथा टिस्टा नदीको बाढीपछि सम्पर्कविहीन भएका इलामका ५ जना परिवारको सम्पर्कमा आएका छन् ।
पछिल्लो समय उनीहरूले परिवारका सदस्यसँग फोन तथा सामाजिक सञ्जालमा कुरा भएको जनाइएको छ । इलाम नगरपालिका–९ का सेनबहादुर कार्की, कुमार बस्नेत, नरमाया बस्नेत, खुसी कार्की र लाक्पा लामा ११ दिनपछि परिवारसँग सम्पर्क गरेको जानकारी प्राप्त भएको इलामका सहायक प्रमुख जिल्ला अधिकारी ध्रुवप्रसाद कोइरालाले जानकारी दिए ।
उनले सम्पर्कविहीन भएका सबैजना स्वदेश फर्किँदै गरेको पनि परिवारका सदस्यबाट जानकारी प्राप्त भएको बताए ।
बाढी आएपछि नेपाली बसोबास गर्ने स्थल तथा आसपासमा विद्युत्समेत कटौती भएको थियो । विद्युत् नहुँदा टेलिफोन तथा अन्य सञ्चारका साधनसमेत अवरूद्ध भएकाले सम्पर्क स्थापित हुन नसकेको जनाइएको छ ।
पाँच जना नेपाली गएको असोज १६ गतेदेखि नै सम्पर्कविहीन भएका थिए । सोही दिन सिक्किमको उत्तरी भेगको हिमतालको माथिल्लो तटीय क्षेत्रमा मुसलधारे वर्षापछि गएको पहिरो र टिस्टा नदीमा बाढी आउँदा धनजनको क्षति भएको थियो ।