पशुपालनमा रमाइरहेका बलराम सापकोटा
बागलुङ, ३१ वैशाख । कोरोना महामारीका कारण १२ वर्षसम्म यहाँको बागलुङ बजारमा मिष्टान्न र होटल सञ्चालन गर्दै आउनुभएको बलराम सापकोटाले व्यवसाय बन्द गर्नुपर्यो । यद्यपि, उहाँले कोरोना महामारीको खराब परिस्थितिलाई अवसरमा बदल्दै गाउँमै कृषि तथा पशुपालन व्यवसाय सुरू गर्नुभयो । त्यस बेलादेखि उहाँ निरन्तर यसैमा रमाइरहनुभएको छ ।
कोरोना महामारीका बेला बजारको व्यवसाय बन्द भएपछि गाउँ गएर पशुपालन र फलफूल खेती गर्न थालेको र हाल त्यसबाट राम्रो आम्दानीकमा साथै सन्तुष्टि पनि मिलिरहेको सापकोटाले बताउनुभयो । हाल आफूले मासिक दुई लाख रूपैयाँ बचत गर्दै आएको सुनाउनुभयो ।
सापकोटाले विसं २०७६ देखि व्यावसायिक कृषि र पशुपालनमा लगानी सुरू गर्नुभएको थियो । उहाँले पशुपालन र सुन्तला खेतीमा गरी करिब एक करोड रूपैयाँ लगानी गरेको सुनाउनुभयो ।
“उत्पादनमा नजोडिएसम्म हुँदैन भन्ने कुरा कोरोनाले सिकायो, पाँच वटा ट्याक्सी थिए सबै छोडेर गाउँ फर्केर ३६ रोपनी जग्गालाई हराभरा बनाउन थाले”, सापकोटाले भन्नुभयो, “यही बिचमा बागलुङ नगरपालिका–५ मालिकाको वडा सदस्य भएर जनताको सेवासँगै कृषि र पशुपालन गरेर अरूलाई पनि प्रेरणा दिन खोजिरहेको छु ।”
हाल सापकोटाले ११ वटा गाई र १३ वटा भैँसी पालिरहनुभएको छ । दैनिक करिब १५० लिटर दुध उत्पादन भइरहेको र उक्त दुध बागलुङ दुग्ध उत्पादन संस्थामार्फत बिक्री हुँदै आएको उहाँले बताउनुभयो ।
“पशुपालनसँगै पशुवस्तु खरिद–बिक्रीको काम पनि गर्दै आएको छु । मासिक चार लाख ५० हजारको दुध बिक्री हुने गरेको छ भने दाना र कर्मचारीलगायतको खर्च कटाएर दुई लाख बचत हुन्छ । बचत रकमले फलफूल बगैँचा विस्तार गरिरहेको छु”, सापकोटाले भन्नुभयो ।
सापकोटाले आफ्नो २७ रोपनी र भाडाको नौ रोपनी जग्गामा एक हजार सुन्तलाका बिरुवा, एक सय १० वटा कागती र ५० वटा ओखरका बिरुवा लगाउनुभएको छ । सुन्तलाबाट अझै आम्दानी सुरु नभए पनि आगामी वर्षदेखि राम्रो उत्पादन हुने उहाँले बताउनुभयो ।
मल्चिङ प्रविधिबाट उहाँले सुन्तला खेती गर्नुभएको छ । धनकुटे जातको सुन्तला लगाएर झार नियन्त्रण, चिस्यान संरक्षण र माटोमा पोषण कायम राख्ने काम गरिएको सापकोटाले बताउनुभयो । कृषिका लागि आवश्यक पानी व्यवस्थापन गर्न गहुँत तथा पानी लिफ्टिङ गरेर करिब दुई सय मिटर माथिसम्म पुर्याएको उहाँले जानकारी दिनुभयो ।
हाल सापकोटाको कृषि तथा पशुपालन फार्ममा चार जनाले रोजगारी पाएका छन् । उहाँले सुन्तला पकेट क्षेत्र बनाउने लक्ष्यसहित काम गरिरहेको जानकारी दिनुभयो । “कोरोनाले एउटा व्यवसाय बन्द गर्नुपर्यो, तर त्यसले अर्को अवसरको ढोका खोल्यो । त्यसैले केही समस्या भएका आत्तिनु हुँदैन । गाउँमा बसेर मेहनत गरे राम्रो आम्दानी गर्न सकिन्छ । यही उदाहरण दिन पनि मैले काम गरिरहेको छु”, उहाँले भन्नुभयो ।