मेला महोत्सवले देशको अर्थतन्त्रलाई सहयोग पुग्छ : मन्त्री सिंह
काठमाडौँ, १२ पुस । उपप्रधान एवम् सहरी विकासमन्त्री प्रकाशमान सिंहले मेला महोत्सवले देशको अर्थतन्त्रलाई लयमा ल्याउन प्रत्यक्ष रुपमा प्रभाव पार्ने बताउनुभएको छ ।
शुक्रबार भक्तपुरमा मध्यपुर महोत्सव उद्घाटन समारोहमा उहाँले महोत्सवमा सबै मौलिक सामानहरु रहेको भन्दै यसबाट देशको अर्थतन्त्र पनि सुधार हुने बताउनुभयो ।
यसका साथै, काम गर्ने इच्छा भए देशभित्रै सम्भावना भएको कुरा पनि महोत्सवले देखाउन खोजेको उहाँको भनाइ छ ।
उहाँले भन्नुभयो, ‘नेपालमा नै बसेर के गर्न सकिन्छ र भन्ने खालको भाष्य नेपालमा बसेको छ । तर, काम गर्ने इच्छा भयो भने सम्भावना प्रशस्त मात्रामा रहेको कुरा पनि यो महोत्सवले देखाउन खोजेको छ । यसको साथै देशको अर्थतन्त्रलाई पनि लयमा ल्याउनको लागि महोत्सवले धेरै ठुलो प्रत्यक्ष रुपमा प्रभाव पार्छ ।’
यस्तै, उहाँले यो महोत्सवले थिमिभित्र रहेका सबै मूर्त, अमूर्त सम्पदाहरुलाई विश्वसामु ल्याउन सहयोग गर्ने भन्दै यो सफलतापूर्वक सम्पन्न हुने विश्वास व्यक्त गर्नुभयो ।
उहाँले भन्नुभयो, ‘मध्यपुर थिमिभित्र रहेका सबै मूर्त, अमूर्त सम्पदाहरुलाई विश्वसामु चिनाउन, देखाउन, सम्झाउन र बुझाउनको लागि महोत्सव आयोजन भएको छ । महोत्सवको लागि जति मेहनत गर्नु भएको छ र जुन लक्ष्य राख्नुभएको छ त्यो पूरा हुन्छ भन्ने पूरा विश्वास छ । हाम्रो संस्कृतिहरु जोगाउन महोत्सवले टेवा पुर्याउने विश्वास गरेको छु ।’