राजनीतिक अपराधिकरण बढ्न थाल्यो : मन्त्री गुरुङ

काठमाडौँ, ४ असोज । सञ्चार तथा सूचना प्रविधिमन्त्री पृथ्वीसुब्बा गुरुङले अहिले राजनीति अपराधिकरण र फोहोरी खेल बढेर गएको बताउनुभएको छ ।

संविधान दिवसको उपलक्ष्यमा आयोजित सांस्कृतिक पुरस्कार २०८१ कार्यक्रममा बोल्दै उहाँले राजनीति आफैँमा फोहोरी खेल नभएको तर राजनीतिलाई गलत रुपमा प्रयोग गर्ने गरिएको बताउनुभयो । उहाँले राजनीतिमा अपराधिक क्रियाकलापको अन्त्य हुनु पर्नेका जोड दिनुभयो ।

उहाँले भन्नुभयो,‘राजनीति चाहिँ अहिले फोहोरी हुँदै गएको छ । पहिला पनि राजनीति भनेको चाहिँ फोहोर खेल हो भनेर शिक्षकहरुले विद्यार्थीहरुलाई सिकाइरहेको पाइन्थ्यो । त्यो गलत कुरा थियो । राजनीति फोहोरी खेल होइन । तर राजनीतिमा जुन किसिमको अपराधिक क्रियाकलाप र अपराध राजनीतिकरण भइरहेको छ त्यो अन्त्य हुनुपर्छ ।’

उहाँले संविधानको आयु लामो बनाउने हो भने परिवर्तनको र संशोधनका गुञ्जायस खोज्नुपर्ने धारणा राख्नुभयो । अहिलेसम्म धेरै पटक संशोधन गरेकैले संविधानहरु जीवित रहेको बताउँदै समयअनुकुल परवर्तन गरेमात्र संविधानलाई जीवित राख्न सकिने बताउनुभयो । धेरै पटक संशोधन गरेको संविधानहरु नै जीवित रहेको उहाँको भनाइ छ ।

उहाँले भन्नुभयो,‘संविधानको आयु लामो बनाउने हो भने परिवर्तनको गुञ्जायस खोजिराख्नुपर्छ । संशोधनको गुञ्जायस खोजिराख्नुपर्छ । धेरै पटक संशोधन गरेको संविधानहरु नै जीवित छन् अहिलेसम्म । ०४६ सालमा बनेको संविधान ७२ सालमा किन भत्कियो भन्दा समयअनुकुल परवर्तन गर्दा नै हो ।’

उहाँले आज देशका समस्या कहाँ छ भनेर पहिचान गर्न आवश्यक रहेको भएता पनि समस्याको पहिचानमा नै अन्यौलता रहेको बताउनुभयो ।