रोनाल्डोको कीर्तिमानी गोलमा पोर्चुगलको विजयी
काठमाडौँ, २१ भदौ । कप्तान क्रिस्टियानो रोनाल्डोको कीर्तिमानी गोलमा पोर्चुगलले युइएफए नेसन्स लिगमा शानदार सुरुवात गरेको छ ।
बिहीबार राति भएको युइएफए नेसन्स लिगको खेलमा कप्तान क्रिस्टियानो रोनाल्डोको कीर्तिमानी गोलको मद्धतमा पोर्चुगलले क्रोएशियामाथि २–१ को जित हासिल गर्दै उत्कृष्ट सुरुवात गरेको हो ।
रोबर्टो मार्टिनेजको नेतृत्वमा रहेको पोर्चुगलको टोलीलाई रोनाल्डो र डियोगो डालोटको गोलको मद्धतले जितायो । जितसँगै पोर्चुगलले समूह ‘ए’ मा तीन अंक जोडेको छ ।
खेलको प्रारम्भिक सातौँ मिनेटमै, म्यान्चेस्टर युनाइटेडका डिफेन्डर डियोगो डालोटले गोल गर्दै पोर्चुगललाई सुरुवाती अग्रता दिलाएका थिए । डालोटले ब्रुनो फर्नाण्डेजको पासलाई गोलमा परिणत गर्दै अग्रता दिलाएका हुन् ।
खेलको ३४औँ मिनेटमा कप्तान रोनाल्डोले ऐतिहासिक ९००औँ गोल गरेपछि पोर्चुगलको अग्रता दोब्बर भयो ।
मिकेल मन्डेसको क्रसलाई रोनाल्डोले हेडरमार्फत् गोलमा परिणत गर्दै आफ्नो करियरको एक महत्वपूर्ण माइलस्टोन पार गरे ।
यस गोलसँगै रोनाल्डो ९०० गोल गर्ने पहिलो खेलाडी बनेका छन् । यस कीर्तिमानसँगै रोनाल्डोको नाममा अन्तर्राष्ट्रिय पुरुष फुटबलमा १३१ गोलको रेकर्ड समेत कायम भएको छ ।
खेलको ४१औँ मिनेटमा क्रोएशियाले एक गोल फर्काउने मौका पायो । क्रोएशियाका खेलाडीले एक क्रस दिएपछि, पोर्चुगलका डालोटले आत्मघाती गोल गरे । जसले पहिलो हाफमा खेलको स्कोरलाई २–१ मा पुर्ायो ।
दोस्रो हाफमा दुवै टोलीले थप गोल गर्न नसकेपछि खेल २–१ को स्कोरमा समाप्त भएको थियो ।
यसैबीच, समूह ‘ए’ को अर्को खेलमा पोल्यान्डले स्कटल्यान्डलाई ३–२ गोलले पराजित गरेको छ ।