बंगलादेशले जित्यो साफ यू–२० च्याम्पियनसिपको उपाधि
काठमाडौँ, १२ भदौ । दक्षिण एसियाली फुटबल महासंघ (साफ) यू–२० च्याम्पियनसिप फुटबलको उपाधि बंगलादेशले जितेको छ ।
सातदोबाटोस्थित एन्फा मैदानमा बुधबार भएको फाइनल खेलमा बंगलादेशले नेपाललाई ४–१ गोलले पराजित गर्दै उपाधि चुमेको हो ।
एकपक्षीय खेलमा बंगलादेशलाई जिताउन मिराजुल इस्लामले दुई तथा यस नोभा र हुसेन राहुलले एक/एक गोल गरे ।
नेपालका लागि समिर तामाङले एक सान्त्वना गोल फर्काए । खेलको सुरुवातदेखि नै दबाबमा रहेको नेपालले घरेलु मैदानमा उपाधि चुम्ने अवसर गुमाएको हो ।
नेपालले समूह चरणको खेलमा भने बंगलादेशलाई २–१ गोलले हराएको थियो ।
नेपालले सेमिफाइनलमा भुटानलाई टाइब्रेकरमा ४–१ गोलले हराउँदै फाइनल यात्रा तय गरेको थियो । बंगलादेशले साबिक विजेता भारतलाई टाइब्रेकरमै ४–३ गोलले हराएर नेपालसँगको फाइनल भेट पक्का गरेको थियो ।
च्याम्पियनसिपमा साफमा आबद्ध पाकिस्तानबाहेक ६ टोलीको सहभागिता रहेको थियो ।