वरिष्ठ मुटुरोग विशेषज्ञ प्राडा राजेन्द्र कोजु ‘गुणलक्ष्मी स्मृति रोटरी स्वास्थ्य सम्मान’ बाट सम्मानित
धुलिखेल, २८ साउन । ‘गुणलक्ष्मी स्मृति रोटरी स्वास्थ्य सम्मान’ बाट वरिष्ठ मुटुरोग विशेषज्ञ प्राडा. राजेन्द्रप्रसाद कोजु सम्मानित हुनुभएको छ । काठमाडौँ विश्वविद्यालय स्कूल अफ मेडिकल साइन्सेजका पूर्वडीन उहाँ धुलिखेल अस्पतालमा कार्यरत हुनुहुन्छ ।
रोटरी क्लब अफ पनौती नवौँ पदस्थापना समारोहका अवसरमा प्राडा कोजू सम्मानित हुनुभएको हो ।
रोटरी क्लब अफ पनौतीका संस्थापक अध्यक्ष एवम् वरिष्ठ स्त्री तथा प्रसूति रोग विशेषज्ञ प्राडा सुमनराज ताम्राकारले दिवंगत माता गुणलक्ष्मी ताम्राकारको स्मरणमा रोटरी क्लब अफ पनौतीबाट बर्सेनी स्वास्थ्य विशेषज्ञलाई प्रदान गर्ने गरी सो सम्मान स्थापना गर्नुभएको हो ।
पहिलो पटक वरिष्ठ मुटुरोग विशेषज्ञ प्राडा राजेन्द्रप्रसाद कोजुलाई सो सम्मान प्रदान गरिएको हो । पनौतीको डायमण्ड हिल रिसोर्टमा आयोजित भव्य समारोहमा प्रमुख अतिथि रोटरी इन्टरनेसनल डिष्ट्रिक्ट ३२९२ नेपाल-भुटानका पूर्वगभर्नर सिए जितेन्द्रबहादुर राजभण्डारीले उहाँलाई सो नगदसहित सम्मान प्रदान गर्नुभएको हो ।
यसैगरी प्राडा ताम्राकारले पिताको स्मरणमा स्थापना गर्नुभएको ‘पुष्पराज स्मृति रोटरी पत्रकारिता सम्मान’ काभ्रेपलाञ्चोक जिल्लाबाट २८ वर्षदेखि निरन्तर प्रकाशित काभ्रे टाइम्स साप्ताहिकलाई प्रदान गरिएको छ ।