हरि ढकालको प्रश्न- डिआइजी मनोज केसीलाई कसरी सरुवा गरियो ?

काठमाडौँ, १३ साउन । राष्ट्रिय स्वतन्त्र पार्टीका सांसद हरि ढकालले एउटा अब्बल राष्ट्र सेवक कर्मचारीलाई थाहै नदिएर सरुवा गर्न नहुने बताउनुभएको छ ।

आइतबार प्रतिनिधिसभाको बैठकमा बोल्दै सांसद ढकालले डिआइजी मनोज केसीलाई यो सरकारले कसरी सरुवा गरेको भनेर प्रश्न गर्नुभयो ।

उहाँले भन्नुभयो, ‘ विश्वासको मत लिएको दुई दिनभित्र कसरी डिआइजी मनोज केसीलाई सरुवा गरियो ? दुई दिनभित्रमा किन र के कारण, के उद्देश्यका लागि सरुवा गरिएको हो । यसको उत्तर गृहमन्त्रीले दिनुपर्ने हुन्छ ।’

साथै उहाँले यो गठबन्धन कुन उद्देश्यले बनेको हो भनेर समेत प्रश्न गनुभएको छ । उहाँले नयाँ गठबन्धन बन्दै गर्दा अनुसन्धानको घेराभित्र रहेर अनुसन्धान हुनु पर्नेलाई मन्त्री बनाएर पुरस्कृत गरिएको बताउनुभयो ।

उहाँले मानव बेचबिखन र हातहतियारसम्बन्धी मुद्दा खेपेकाहरुलाई मन्त्री बनाएको आरोप लगाउनुभयो ।

‘नयाँ सरकार बन्दै गर्दा यो उद्देश्य हामीलाई थाहा थियो । अहिले श्रृंखला देखिन थाल्या छ । पहिलो श्रृंखला सरकार गठनपछि मन्त्रिमण्डल बन्दा नै देखिया थियो । अनुसन्धानको घेरा वरिपरि रहेकाहरूलाई मन्त्री दिएर पुरस्कृत गरियो । दोस्रो, प्रादेशिक मन्त्री बनाउँदा गण्डा नाइके, अपहरण फिरौती तथा मानव बेचबिखनमा मुद्दा खेपेकालाई रोजियो,’ उहाँले भन्नुभयो ।