क्रिकेट मैदान निरीक्षणमा खेलकुदमन्त्री श्रेष्ठ, सन्दीपलाई दिए आश्वासन

काठमाडौँ, १७ जेठ । युवा तथा खेलकुदमन्त्री विराजभक्त श्रेष्ठले कीर्तिपुरस्थित क्रिकेट रंगशालामा निरीक्षण गर्नुभएको छ । बिहीबार मैदानको निरीक्षण गर्दै उहाँले बजेट बढेर आए पनि गर्नुपर्ने कामहरु असीमित रहेको भन्दै यसमा सबैको सहकार्य आवश्यक रहेको बताउनुभयो ।

उहाँले भन्नुभयो, ‘पाँच वर्षको सबैभन्दा ठुलो बजेटमा आइपुगेका छौँ । तर, चाहनाहरु असीमित छन् तर स्रोत र साधन पुँजी सीमित छन् । यसमा हामी सबै एकै स्थानमा बसेर काम गर्नुपर्ने बाध्यता छ । सधैँ राज्यसँग आश गरेर हुँदैन । खेलकुद भनेको आफैँमा व्यवसायिक हुनुपर्छ । लगानी गरेवापत् राज्यले पनि केही खोज्छ ।’

साथै दर्शकहरुको खानेपानी र शौचालयको सुविधाको विषय महत्वपूर्ण भएको भन्दै त्यसलाई पनि सम्बोधन गर्दै जाने भन्ने निष्कर्षमा पुगेको बताउनुभयो । रकमको सहि सदुपयोग गर्ने, खेलाडीहरुको लागि होस्टेलको व्यवस्था र संरचनालाई सुदृढ गर्ने विषयमा मन्त्रालय गम्भीरताका साथ लाग्ने पनि उहाँले बताउनुभयो ।

उहाँले भन्नुभयो, ‘छिमेकी राष्ट्र भारतले सहयोग गर्ने भनेको २० करोड रुपैयाँको कुरामा छलफल भएको छ । अब त्यसलाई कहाँ कसरी सदुपयोग गर्ने, सामाजिक उत्तरदायित्वको कुरा पनि बजेटमा आएको छ । त्यो रकमलाई कहाँ प्रयोग गर्ने वा खेलाडीहरुको लागि होस्टेल बनाउनुपर्ने कुरामा छलफल भइरहेको छ । त्यसका लागि बाहिरी देशको प्रचलन अनुसार जाने र व्यवहारिक तरिकाले संरचनालाई सुदृढीकरण गर्ने साथै अन्तर्राष्ट्रिय स्तरका संरचना तयार गरेर प्रतिस्पर्धामा आउने हाम्रो उद्देश्य हो ।’

सोही क्रममा महासचिव पारस खड्काले मन्त्री श्रेष्ठको कुराले उत्साहित भएको भन्दै कानुनको अधिनमा रहेर छिटोभन्दा छिटो परिणाम ल्याउने हिसाबले अगाडि बढ्ने बताउनुभयो ।

उहाँले भन्नुभयो, ‘अहिलेको हाम्रो प्राथमिकताको कुरा भनेको दर्शकहरु बस्ने स्थानलाई डिभाइड गर्ने, महिला–पुरुष शौचालय बनाउने र भिआइपी एरियामा बसेर हेर्न मिल्ने संरचना बनाउने योजना भएको छ । आजको कुराले उत्साहित भएका छौँ । कानुनमा बसेर काम अगाडि बढाएर छिटोभन्दा छिटो परिणाम ल्याउन हिसाबले अगाडि बढ्ने छौँ ।’

अवलोकन भ्रमणमा क्रममा मैदानमा अभ्यास गरिरहेका क्रिकेटर सन्दीप लामिछानेलाई पनि भेटेर मन्त्री श्रेष्ठले कूटनीतिक पहलहरु भइरहेको सुनाउँदै सरकार गम्भीर रुपमा लागेको सुनाउनुभयो ।

उहाँले भन्नुभयो, ‘हाम्रो तर्फबाट सतप्रतिशत काम भएको छ । उताको कुरा के के हुन्छ हेरौँ । त्यसमा कूटनीतिक कुराहरु छन् । सरकार पनि एकदम चिन्तित छ । कूटनीतिक कार्यमा गएर रोकिएको हो । केही राम्रो नै हुन्छ भन्ने आशा गरौँ ।’

निरीक्षणमा मन्त्री, राष्ट्रिय खेलकुद परिषद् (राखेप)का सदस्य सचिव टंकलाल घिसिङ र नेपाल क्रिकेट संघ (क्यान) का सचिव पारस खड्कालगायतका कर्मचारीहरु गएका थिए ।