एमालेले हार्न मिल्दैन : ओली

126

काठमाडौँ, १७ चैत । नेकपा (एमाले)का अध्यक्ष केपी शर्मा ओलीले गत निर्वाचनमा एमालेले आफूविरुद्धको खतरनाक गठबन्धनका कारण पराजयको सामना गर्नुपरेको उल्लेख गर्नुहुँदै आसन्न उपनिर्वाचनमा सुखद् परिणाम ल्याउने दाबी गर्नुभएको छ ।

शनिबार एमाले बझाङ–काठमाडौँ सम्पर्क मञ्चको आयेजनामा बझाङ प्रदेश सभा–१ को उपनिर्वाचन विशेष भेलालाई सम्बोधन गर्नुहुँदै उहाँले गत निर्वाचनमा सबै दल एकातिर र केही नेताले पार्टी फुटाएकै कारण केही ठाउँमा कमजोर नतिजा आएको उल्लेख गर्नुभयो । यसपटकको उपनिर्वाचनमा हार्न नमिल्ने पनि उहाँले बताउनुभयो ।

उहाँले भन्नुभयो, ‘गत निर्वाचनमा सबै पार्टी एकातिर र नेकपा (एमाले) एकातिर, त्यस्तो अवस्थाको सामना गर्नुपर्दा पराजयको पीडा व्यहोर्नुपरेको थियो । तर, यसपटक हामी सुखद् परिणाम गर्न चाहन्छौँ । यसपल्ट हामी हार्दैनौँ, हार्न मिल्दैन । गत वर्षको निर्वाचनमा नेकपा एमालेकै हस्ती भनिएका नेताहरु पार्टी फुटाएर गएका थिए । एमाले त शून्य सिटमा झर्छ समेत भनेका थिए ।’

पार्टीविरुद्धको चर्को गठबन्धनका बाबजुद एमाले लोकप्रिय पार्टी हुँदै आफ्नो साख कायम राखेको अध्यक्ष ओलीको भनाइ छ ।

गत वर्षको निर्वाचनमा गठबन्धन गरेकै कारण गणितीय हिसाबले अन्य दलहरु केही सिट अगाडि गए पनि खराब नेताहरु पार्टीबाट निस्किनु नै उपलब्धि भएको ओलीले बताउनुभयो ।

एकीकृत समाजवादीका अध्यक्ष माधवकुमार नेपालको नाम नलिइ उनले सांकेतिक रुपमा आलोचना गर्नुभयो । ‘हाम्रो पार्टीमा केही कमजोरी रहनु बेग्लै कुरा होला, केही मान्छेहरु सडेर गलेर जानु बेग्लै कुरा होला । एउटा राम्रो काम के भएको थियो भने कुहिएका आलुहरु बोराबाट निकालेर बाहिर फालिएका थिए,’ उहाँले भन्नुभयो ।

बझाङमा उपनिर्वाचन भएको ठाउँमा डोरी अल्झ्याएर जितेको उल्लेख गर्नुहुँदै सक्रियता र ऊर्जा लिएर अगाडि बढेमा एमाले जित निश्चित रहेको ओलीले दाबी गर्नुभयो ।

Share This:
सम्बन्धित खबर
Loading...