प्रधानमन्त्री देउवासँगको भेटपछि ओलीले भने,‘ कुराकानी राम्रो भयो’
काठमाडौँ । नेकपा (एमाले)का अध्यक्ष केपी शर्मा ओलीले प्रधानमन्त्री शेरबहादुर देउवासँगको भेटवार्ता राम्रो भएको बताएका छन् ।
ओलीलाई भेट्न प्रधानमन्त्री देउवा भक्तपुरको बालकोटस्थित ओली निवासमै पुगेका थिए । देउवा–ओलीबीच एक घन्टा वाताए भएको जनाइएको छ । भेटपछि ओलीले सञ्चारकर्मीको जिज्ञासामा लामो जबाफ दिएनन् । वार्ता कस्तो भयो ? भन्ने सञ्चारकर्मीको प्रश्नमा ओलीले भने,“कुराकानी राम्रो भयो ।”
ओलीका प्रेस संयोजक रामशरण बजगाईंले दुई नेताहरुबीच एक घन्टासम्म वार्ता भएको तर ‘वान टु वान’ वार्ता भएकाले आफूलाई थाहा नभएको स्पष्ट पारे । प्रधानमन्त्री देउवाका सचिवालयले पनि त्यसबारे बोलेको छैन ।
एमालेले प्रतिनिधिसभा बैठकमा गरेको निरन्तर अवरोध हटाउनेलगायत विषयमा छलफल गर्न प्रधानन्त्री देउवा एमाले अध्यक्ष ओलीलाई भेट्न आज बिहान १० बजे बालकोट पुगेका थिए । संसद्को अवरोध हटाउनेबारे छलफल गर्न प्रधानमन्त्री ओलीले सर्वदलीय बैठक डाक्दासमेत एमाले उपस्थित नभएपछि प्रधानमन्त्री देउवा छलफलका लागि ओली निवास बालकोट पुगेका हुन् ।