सञ्चार माध्यम स्वतन्त्र, निष्पक्ष र पारदर्शी हुनुपर्छ : प्रधानमन्त्री ओली

काठमाडौं । प्रधानमन्त्री केपी शर्मा ओलीले सरकार प्रेस स्वतन्त्रताको रक्षामा निष्ठापूर्वक उभिएको बताएका छन् । उनले छैटौँ राष्ट्रिय पत्रकारिता दिवस र गोरखापत्रको १२१औँ वर्ष प्रवेशका अवसरमा शुभकामना व्यक्त गर्दै यस्तो बताएका हुन् ।

पत्रकारिता दिवसको अवसरमा सम्पूर्ण पत्रकार तथा सञ्चारकर्मीलाई पेसागत उन्नति र कार्य सन्तुष्टिका लागि समेत शुभकामना व्यक्त गरेका छन् । उनले भने, “नेपालको पहिलो समाचारपत्र गोरखापत्रको शुभारम्भ भएको दिनको स्मृतिमा मनाउन लागिएको राष्ट्रिय पत्रकारिता दिवसका अवसरमा सम्पूर्ण पत्रकारप्रति शुभकामना व्यक्त गर्दछु ।”

आमसञ्चार माध्यमहरूले मानवता, भौगोलिक अखण्डता र राष्ट्रियताको पक्षमा सधैँ दृढतापूर्वक उभिनुपर्ने धारणा प्रधानमन्त्री ओलीले व्यक्त गरे । आमसञ्चार माध्यम संघीय एकाई, विभिन्न जातजाति, धर्म र सम्प्रदायबीचको सम्बन्धका सेतूका रूपमा स्थापित हुनुपर्ने बताउँदै उनले भने, “नेपालको लोकतान्त्रिक आन्दोलनमा सञ्चार जगतले निर्वाह गरेको भूमिकाको यस अवसरमा म स्मरण गर्न चाहन्छु ।”

उनले प्रेस स्वतन्त्रता, लोकतन्त्र र राष्ट्रियताको संरक्षण र सम्बर्द्धन, सामाजिक न्याय र समानताको प्रत्याभूतिमा सरकार दृढ रहेको बताए । उनले भने, “यस दिवसले सम्पूर्ण सञ्चारकर्मी र सञ्चार उद्यमीलाई सामाजिक उत्तरदायित्व बहन गर्दै, संविधानप्रदत्त हक अधिकार उपभोग गर्न थप प्रेरणा गर्नेछ भन्ने विश्वास लिएको छु ।”

‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न सरकारले लिएको अग्रसरतालाई सहयोग पुर्याउन सञ्चार माध्यमहरूको सिर्जनात्मक र रचनात्मक भूमिका आवश्यक भएको प्रधानमन्त्री ओलीले बताए । देशलाई आर्थिक सामाजिक रूपान्तरण गरी राष्ट्रलाई समृद्ध र जनतालाई सुखी बनाउने अभियानमा आमसञ्चार माध्यमहरूबाट सशक्त भूमिका निर्वाह हुनसक्ने विश्वाससमेत उनले व्यक्त गरे ।

सञ्चार माध्यम र सञ्चारकर्मीको भूमिका पारदर्शी हुन नसक्दा त्यसको दूरगामी नकारात्मक असर समाजले भोग्नुपर्ने चर्चा गर्दै उनले स्वतन्त्र, निष्पक्ष र पारदर्शी बनाउनुपर्ने बताए । उनले व्यक्तिलाई हानि पुग्ने, सार्वजनिक सदाचार, सद्भाव र नैतिकता प्रतिकूल हुने आधारहीन सामग्री सम्प्रेषण हुन नदिन सञ्चारकर्मी सजग हुनुपर्ने धारणा व्यक्त गरे।

पूर्वाग्रह, दूराग्रह, निन्दा र पक्षपोषण स्वतन्त्र पत्रकारिताको आधारभूत मूल्यविपरीत भएको चर्चा गर्दै उनले भने, “यस्ता चरित्रलाई हटाएर मात्रै हामीले पत्रकारिताप्रतिको विश्वसनीयता बढाउन सक्दछौँ ।” यसैगरी हरेक व्यक्तिको स्वाभिमान र प्रतिष्ठामा आँच आउन नदिन संविधानको मार्गदर्शनमा कानुनी व्यवस्थालाई सुदृढ बनाउन पनि प्रतिबद्ध रहेको उनले स्पष्ट पारे । गोरखापत्रले १ सय २० वर्षदेखि निरन्तर नेपाली भाषाको सेवा गर्दै आएको स्पष्ट गर्दै उनले संस्थानमा कार्यरत सम्पूर्ण पत्रकार, प्रशासक, प्राविधिक र कर्मचारीहरूमा बधाई तथा शुभकामना प्रकट गरे ।