तत्काल लकडाउन र सीमानाका बन्द गर्ने सरकारको सोच छैन : अर्थमन्त्री पौडेल
काठमाडौं । अर्थमन्त्री बिष्णुप्रसाद पौडेलले कोरोना भाइरस (कोभिड–१९) संक्रमण रोकथामका लागि बन्दाबन्दी नहुने बताएका छन् ।
कोरोनाको दोस्रो लहरबाट जोगिनुपर्ने अवस्था सँगसँगै आर्थिक सामाजिक क्रियाकलापलाई नियमित गर्नुपर्ने भएकाले स्वास्थ्य मापदण्डलाई कडाइकासाथ पलना गराउने तर लकडाउन र सीमा बन्द नगरिने बताएका हुन् ।
उनले भने, “हामी आशंकाबाट होइन यथार्थबाट निर्देशित भएर अगाडि बढ्नुपर्छ । सरकारको सोच के हो भने कोभिडको दोस्रो लहरको चर्चा चलिरहेको छ, त्यसबाट हामी जोगिनु पर्नेछ । अर्कोतर्फ आर्थिक सामाजिक क्रियाकलापलाई नियमित र सूचारु पनि गर्नुपर्ने आवश्यकता छ । त्यसकारणले हामी आर्थिक, सामाजिक क्रियाकलापलाई सूचारु पनि गर्छौँ, नियमित पनि गर्छौँ र स्वास्थ्य मापदण्डलाई ख्याल गरेर अगाडि बढ्छौँ । अहिले सरकारले सीमानाका बन्द गर्ने, लकडाउन गर्नेतर्फ सोचेको छैन । त्यो उपयुक्त पनि हुँदैन ।”