बागमती प्रदेशमा आइसियुको सङ्ख्या बढाइन्छ : मुख्यमन्त्री पौडेल
हेटौंडा । बागमती प्रदेशका मुख्यमन्त्री डोरमणि पौडेलले कोरोना नियन्त्रणका लागि आइसियुको सङ्ख्या बढाइने बताएका छन् । बुधबार संघीय संसदको शिक्षा तथा स्वास्थ्य उपसमितिका पदाधिकारीसँग भएको छलफलमा मुख्यमन्त्री पौडेलले हाल गम्भिर प्रकृतिका बिरामीहरू देखापर्न थालेकोले आइसीयुको सङ्ख्या बढाउनु पर्ने अवस्था आएको बताए ।
पौडेलले प्रदेश सरकारले आइसोलेसन कक्षहरुको निर्माण एवं सञ्चालन गरिरहेको जानकारी दिदै कोरोना नियन्त्रणका लागि सरकार जिम्मेवार भएर लागेको धरणा राखे । अन्य जिल्लामा संक्रमण कम भएपनि अहिले संघीय राजधानी समेत रहेको काठमाडौंमा कोरोनाबाट थप सङ्कट उत्पन्न हुन सक्नेतर्फ सचेत हुनुपर्ने भन्दै पौडेलले संघ, प्रदेश र स्थानीय तहको समन्वय र सहकार्य अनिवार्य रहेकोमा जोड दिए । पौडेलले काठमाडौंको बढ्दो संक्रमण दर घटाउन प्रदेशले विभिन्न स्थानमा क्वारेन्टिन र आइसोलेसन निर्माण गरी काम गरिरहेको जानकारी दिए ।
कार्यक्रममा कोरोना संक्रमणका कारण शिक्षा क्षेत्र समस्याग्रस्त बनेको विषयमा छलफल भएको थियो । छलफलका क्रममा समितिका सदस्य जीवनराम श्रेष्ठले शिक्षा र स्वास्थ्यका क्षेत्रमा प्रदेशसँग समन्वय र सहकार्य हुने बताए ।