जसपाका शीर्ष ६ नेताको बैठक, बैठक राख्ने विषयमै विवाद
काठमाडौं । जनता समाजवादी पार्टीका ६ जना शीर्ष नेताहरूको बैठक सकिएको छ । पार्टी कार्यालय बालकुमारीमा मंगलबार बसेको बैठकमा समसामयिक राजनीतिक विषयमा छलफल भएको अध्यक्ष उपेन्द्र यादवले बताए ।
“पछिल्लो समसामयिक राजनीतिक विषयमा छलफल गर्न शीर्ष नेताहरुबीच अनौपचारिक छलफल भएको हो” उनले भने, “तर, छलफलमा कुनै निर्णय भएनन् । अब एक–दुई दिनमा फेरि बैठक बस्दैछ ।”
स्रोतका अनुसार, बैठक राख्ने विषयमै शीर्ष नेताहरुबीच विवाद भएको छ ।
बैठकमा नेताहरू महन्थ ठाकुर, बाबुराम भट्टराई, उपेन्द्र यादव, राजेन्द्र महतो, अशोक राई र राजेन्द्र श्रेष्ठ सहभागी थिए ।
पछिल्लो सयम जसपाभित्र दुई मत देखिएको छ । जसपाका अध्यक्ष महन्थ ठाकुर र वरिष्ठ नेता राजेन्द्र महतो प्रधानमन्त्री ओली सरकारकै पक्षमा देखिएका छन् भने बाबुराम भट्टराई र उपेन्द्र यादव ओलीलाई जसरी पनि सत्ताबाट निकाल्नुपर्ने पक्षमा छन् ।