पहिचानको महत्त्व बुझाउन परम्परागत भेषभूषामा सांसद्
काडमाडौँ, १२ चैत । आमाले सिलाइदिएको लहङ्गा र चोलियासहित पुर्ख्यौली थारू वेषभूषामा सजिएकी सांसद गीता चौधरीले संसद्मा आफ्नै थारू मातृभाषामा सपथ लिनुभयो । उहाँले शपथ लिन आउँदा सानी छोरीलाई परम्परागत भेषभूषामा सजाएर ल्याउनुभयो ।
“मेरो समुदायका लागि आज गौरवको दिन हो”, सांसद चौधरीले प्रतिनिधिसभामा शपथ लिएपछि प्रतिक्रिया दिँदै भन्नुभयो, “सङ्घीयताको मर्मअनुसार मौलिक पहिचान लिएर थारू भेषभूषामा आएकी हुँ, आमा र देश मेरा लागि उस्ता उस्तै हो ।” उहाँले आफूले लगाएको पहिरन आमाले सिलाइ दिएको बताउनुभयो ।
संसद् देशका जनताको प्रतिविम्ब झल्किने साझा फूलबारी जस्तै भएकाले पहिचान खुलाएर आउनु सान्दर्भिक लागेको सांसद चौधरीले बताउनुभयो । उहाँले भन्नुभयो, “मैले छोरीलाई परम्परागत लुगा लगाएर ल्याएकी छु । जुन आउने पुस्तालाई संस्कृति हस्तान्तरण गराउनु जरुरी छ ।”
शिरमा लगाएको पुर्ख्यौली गहना ‘मङ्गौरी’, घाटीमा लगाउनेमाला ‘टौक’लगायत चाँदीले बनेका गहना देखाउँदै सांसद चौधरीले यी सबै गरगहना पुस्तौनी रहेको बताउनुभयो । सङ्घीयताको मर्म र भावना अनुरुप प्रतिनिधिसभामा समावेशिताको अर्थ बुझाउन सांसद चौधरीले जस्तै परम्परागत भेषभूषामा उपस्थिति हुनुभएको थियो ।
परम्परागत पहिरनमा सबैको ध्यान तान्नुभएका सांसदमध्ये सांसद सुधन गुरुङ एक हुनुह३न्थ्यो । गोर्खाका गुरुङले टोपीको शिरमा खुकुरीको आकृति झल्काउँदै गुरुङ समुदायको पोसाकमा संसद्मा पुग्नुभयो । सधैँ जस्तै, कोटपाइन्टमा देखिने गुरुङ परम्परागत भेषमा शपथ खानुभएको थियो । पहिरनसँगै मुहारमा उत्साह र जोश झल्किएको थियो । आमसञ्चारलाई प्रतिक्रिया दिने क्रममा उहाँले भन्नुभयो, “जनताको भावना मर्न दिने छैनौँ ।”
नेपाली कम्युनिस्ट पार्टीबाट सांसद हुनुभएका दाङका सांसद भीमकुमारी बुढामगरले समावेशीको सन्देश दिन पुर्ख्यौली भेषभूषामा सपथ ग्रहण गर्न आएको बताउनुभयो । मगर समुदाय सांस्कृतिक हिसाबले अत्यन्त समृद्ध समुदाय रहेको सुनाउँदै समाजमा समुदायको पहिचान स्थापित गर्न पहिरनले महत्त्वपूर्ण सन्देश झल्किने धारणा राख्नुभयो ।
“सांस्कृतिक महत्त्व कहिल्यै भुल्नुहुँदैन”, सांसद बुढामगरले भन्नुभयो, “यहीँ लगाएर हुर्किए यही लगाएर संसद्मा आएँ ।”
रास्वपाका सांसद महोत्तरीका प्रमोदकुमार महतोले श्रीराम लेखिएको गम्झा, शिरमा रातो रुमाल र कुर्था सुरुवाल लगाउनुभएको थियो । उहाँका अनुसार तराई क्षेत्रको आभाव गराउने आधार पहिरन भएको बताउँदै उहाँले संसद्मा तराईको अस्थित्व महसुस गराउन लगाएको बताउनुभयो । “पहिरनले अपनत्व महसुस गराउछ भने राष्ट्रिय भाव बलियो बनाउछ”, सांसद महतोले भन्नुभयो, “म सांसद नहुँदा मौलिक पहिरन नै लगाउछु । आज संसद्मा उपस्थिति हुँदा नलगाउने कुरै भएन ।” संसद्मा उपस्थिति अरू सांसदहरुले समुदायको भाव झल्किने पहिरनमा उत्साहका साथ देखा पर्नुभएको थियो ।
ट्रान्सजेण्डरको प्रतिनिधित्व गर्दै रास्वपाबाट सांसद भन्नुभएकी भूमिका श्रेष्ठ आफ्नो नेवार समुदायको संस्कृति झल्किने हाकुपटासी सारीमा देखिनुभयो । उहाँले त्यसै अनुसारको नेवार गरगहना लगाउनुभएको थियो । संसद्मा एउटा सांसदले समुदायदेखि राष्ट्रको अस्थित्व सम्बोधन गर्नुपर्ने हुँदा परम्परागत पहिरनमा सजिएको बताउनुभयो । “समुदायको सम्मानसँगै, जनताको सेवा गर्नुपर्छ”, सांसद श्रेष्ठले भन्नुभयो ।