काङ्ग्रेस केन्द्रीय कार्यसमितिको बैठक : विभिन्न ११ प्रस्तावमाथि छलफल जारी

काठमाडौँ, १० चैत । नेपाली काङ्ग्रेसको केन्द्रीय कार्यसमितिको बैठक आजदेखि सुरू भएको छ । पार्टी केन्द्रीय कार्यालय बिपी स्मृति भवन ललितपुरमा सुरू भएको बैठकमा विभिन्न ११ प्रस्तावमाथि छलफल जारी रहेको छ ।

काङ्ग्रेस सभापति गगनकुमार थापाको सभापतित्वमा सुरू भएको बैठकमा महामन्त्री प्रदीप पौडेलले ११ प्रस्ताव प्रस्तुत गर्नुभएको थियो । बैठकमा समसामयिक, सुशासन स्थापना, संविधान संशोधन अध्ययन तथा सुझावका लागि विज्ञसहितको समिति गठन, पार्टीको १५ औँ महाधिवेशनको कार्यतालिका, केन्द्रीय निर्वाचन समिति गठनको बारेमा छलफल भएको छ ।

यस्तै, प्रतिनिधिसभा सदस्यहरूलाई अभिमुखीकरण, क्रियाशील सदस्यता वितरण र अद्यावधिक विशेष अभियान, प्रदेश सरकार र स्थानीय सरकारको समीक्षा, समन्वय र थप प्रभावकारिता, भ्रातृ सङ्घ, शुभेच्छुक संस्था र जनसम्पर्क समिति सम्बन्धमा, केन्द्रीय लेखा समिति गठन र विविध विषयमा छलफल भएको कांग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुलालले जानकारी दिनुभयो ।

आजको बैठकमा केन्द्रीय सदस्यहरू डा.गोपाल दहित, तारामान गुरुङ, मैकुलाल वाल्मिकी, अजयबाबु शिवाकोटी, भरत कुमार शाह, सुधीर शिवाकोटी, शम्भुलाल श्रेष्ठ, नरेन्द्र कुमार केरुङ, रेशम बहादुर बानियाँ, जीतनारायण श्रेष्ठ, रमेश धमला, दीपन कुमार श्रेष्ठ, वसन्त भट्टराई, जनकराज गिरी, शम्भु बहादुर बुढाथोकी, तीर्थजङ्ग शाही, टेकराज पौडेलले धारणा राख्नुभयो ।

यसैगरी, केशवराज शर्मा आचार्य, रामबहादुर कार्की, नारायणप्रसाद भट्टराई, शिव बहादुर सुनार, सूर्य बहादुर विक, दिनेश सुनार, छन्द बहादुर पहराई, जगदीशचन्द्र उपाध्याय, रामपल्टन साह, मधेस प्रदेशका सभापति कृष्णप्रसाद यादव, बागमती प्रदेशका सभापति इन्द्र बहादुर बानियाँले आ–आफ्नो धारणा राख्नुभएको थियो ।

आजको बैठकमा धारणा राख्ने क्रम जारी रहेकाले केन्द्रीय कार्यसमितिको अर्को बैठक भोलि बिहान ११ बजे पार्टी केन्द्रीय कार्यालयमा पुनः बस्ने कावा मुख्यसचिव दुलालले बताउनुभयो ।