भारतमा कोरोना भाइरस संक्रमितको संख्या ९५ लाख नाघ्यो
नयाँदिल्ली, एएनआई । भारतमा कोभिड–१९ बाट संक्रमितको संख्या बिहीबारसम्ममा ९५ लाख नाघेको केन्द्रीय स्वास्थ्य तथा परिवार कल्याण मन्त्रालयले जनाएको छ ।
विगत चौबीस घन्टामा संक्रमित हुनेको संख्या ३५ हजार ५ सय ५१ रहेको छ । कूल संक्रमित ९५ लाख ३४ हजार ९ सय ६५ मध्ये सक्रिय संक्रमितको संख्या ४ लाख २२ हजार ९ सय ४३ रहेको छ ।
भारतमा हालसम्म ८९ लाख ७३ हजार व्यक्ति संक्रमणमुक्त भएका छन् । विगत २४ घन्टामा ५ सय २६ जनाको कोरोना संक्रमणका कारण मृत्यु भएको मन्त्रालयले जनाएको छ । यो सहित भारतमा कोरोना संक्रमणका कारण मृत्यु हुनेको संख्या एक लाख ३८ हजार ६ सय ४८ पुगेको छ ।
भारतीय स्वास्थ्य अनुसन्धान परिषदले देशभर १४ करोड ३५ लाख नमूना परीक्षण गरिएको जनाएको छ । भारतमा विगत २६ दिनदेखि ५० हजारभन्दा कम व्यक्ति संक्रमित भेटिएका छन् । पछिल्लो पटक गत नोभेम्बर ७ मा ५० हजार व्यक्ति संक्रमित भेटिएका थिए ।
भारतीय राज्य महाराष्ट्रमा सक्रिय संक्रमितको संख्या अझै ८८ हजार ५ सय ३७ छ । यस राज्यमा ४७ हजार ३ सय ५७ जनाको मृत्यु भइसकेको छ ।
यसैबीच, विश्वभर कोरोना संक्रमितको संख्या ६ करोड ४८ लाख ४४ हजारभन्दा बढी व्यक्ति संक्रमित भएका छन् । कोरोना संक्रमितमध्ये १४ लाख ९९ हजार ३ सय ४६ जनाको ज्यान गइसकेको विश्व स्वास्थ्य संगठनले जनाएको छ ।
कोरोना भाइरसको संक्रमणबाट सर्वाधिक असर परेको संयुक्तराज्य अमेरिकामा हालसम्म एक करोड ४३ लाख संक्रमित भएकामध्ये २ लाख ७९ हजार ८ सय ६५ जनाको मृत्यु भइसकेको छ । तेस्रो सर्वाधिक असर परेको ब्राजिलमा ६४ लाख ३६ हजारभन्दा बढी व्यक्ति संक्रमित भएका र त्यसमध्ये एक लाख ७४ हजार ५ सय ३१ जनाको मृत्यु भएको छ ।
विश्वभर मृत्यु भएकाको संख्याका आधारमा चौथो स्थानमा मेक्सिको रहेको छ जहाँ एक लाख सात हजार ५ सय ६५ जनाको मृत्यु भइसकेको छ । बेलायतमा ५९ हजार ६ सय ९९, इटालीमा ५७ हजार, फ्रान्समा ५३ हजार ८ सय १६, इरानमा ४८ हजार ९ सय ९०, स्पेनमा ४५ हजार ७ सय ८४ तथा रसियामा ४१ हजार ५३ जनाको मृत्यु भइसकेको छ ।