एमालेमा आफूलाई मात्रै शुद्ध ठान्ने र पूर्वाग्रह राख्ने संकीर्णवाद छ : मन्त्री गुरुङ

काठमाडौँ, ७ फागुन । नेकपा (एमाले)का उपमहासचिव समेत रहनुभएका सञ्चार तथा सूचना प्रविधिमन्त्री पृथ्वी सुब्बा गुरुङले एमालेभित्र संकीर्ण र दक्षिणपन्थी अवसरवादतिर लैजाने विचार रहेको बताउनुभएको छ ।

बुधबार काठमाडौँमा आयोजित प्रेस चौतारी नेपाल एशोसिएट प्रदेश समितिको दोस्रो अधिवेशनमा बोल्नुहुँदै उहाँले एमालेको आफूलाई मात्रै शुद्ध ठान्ने र अरुलाई ल्याउन नचाहने, ल्याउँदाखेरी पनि जिम्मेवारी यथोचित नदिने, पूर्वाग्रह राखिराख्ने जस्तो संकीर्णवादले आजको कम्युनिस्ट आन्दोलन कमजोर बनाएको बताउनुभयो ।

उहाँले भन्नुभयो, ‘हाम्रोभित्रको अर्को रोग भनेको दक्षिणपन्थी अवसरवाद हो । अहिले हाम्रो पार्टीमा एउटा विचार छ, त्यो संकीर्ण विचार हो, त्यो पनि दक्षिणपन्थी अवसरवादतिर लैजाने विचार हो । त्यो के भन्दा, होइन अरु पार्टीका मान्छेहरुलाई किन ल्याउने ? हामी सबैभन्दा राम्रो पार्टी, कांग्रेसलाई ल्यायो भने त्यसले पार्टीलाई खत्तम पार्छ, राप्रपा त झन ल्याउनै हुँदैन, माओवादीलाई किन ल्याउने ? यति धेरै भ्रष्ट भइसकेको छ अहिले । आफूलाई मात्रै शुद्ध ठान्ने र अरुलाई ल्याउन नचाहने, ल्याउँदाखेरी पनि जिम्मेवारी यथोचित नदिने, अहिलेपनि हेपिराख्ने, पूर्वाग्रह राखिराख्ने यो संकीर्णवादले आजको कम्युनिस्ट आन्दोलन कमजोर बनाएको छ ।’

त्यस्तै, उहाँले चुनावमा आफूले टिकट पाएन भने आफ्नो पार्टीको उम्मेदवारलाई नै हराउन लागि पर्ने प्रवृत्ति पार्टीभित्र छ्याप्छ्याप्ती भेटिने पनि बताउनुभयो । आफैँभित्रको अराजकताले जनताले प्रदान गरेको विश्वासलाई पुँजीकृत गर्न नसके एमालेको हार निश्चित रहेको उहाँको भनाइ छ ।

उहाँले भन्नुभयो, ‘चुनावमा आफूले टिकट पाएन भने आफ्नो पार्टीको उम्मेदवारलाई हराउन लाग्ने अहिले हाम्रो पार्टीभित्र छ्याप्छ्याप्ती पाइन्छ । हुलमा हिँड्यो भने त्यस्ता अराजक मान्छेहरु धेरै ठोकिन्छन् । संगठनभित्र यस्तो भएपछि चुनाव जितिन्छ ? आजको हाम्रो सबैभन्दा ठुलो लडाइँ त चुनाव हो । जनताले गरेको विश्वासलाई हामीले सुरक्षित राख्न सकेनौँ भने वा हाम्रो आफैँभित्रको अराजकताले जनताले प्रदान गरेको विश्वासलाई पुँजीकृत गर्न सकेनौं भने हाम्रो हार निश्चित छ ।’