संविधान संशोधनको विषयमा तलमाथि हुँदैन : मन्त्री गुरुङ
काठमाडौँ, २६ पुस । सञ्चार तथा सूचना प्रविधिमन्त्री पृथ्वी सुब्बा गुरुङले संविधान संशोधनको कुरामा कुनैपनि तलमाथि नहुने बताउनुभएको छ ।
शुक्रबार मन्त्रिपरिषद्को बैठकको निर्णय सार्वजनिक क्रममा पत्रकारले सोधेको प्रश्नको जवाफ दिनुहुँदै उहाँले काम गर्न बाधा पुर्याइ रहेको ११ वटा कानुनहरु संशोधनमा ल्याउने भनेर कानुनविद्हरु रहेको कार्यदल बनाएको भन्दै संविधान संशोधन हुने बताउनुभयो ।
उहाँले भन्नुभयो, ‘काम गर्न बाधा पुर्याइरहेको ११ वटा कानुनहरुको पहिचान गरी संसद्मा पेश गर्ने गरेर संशोधनमा ल्याउन र त्यसको तयारीका लागि पनि कानुनविद्हरु रहेको कार्यदल बनाएका छौँ । त्यसकारण संविधान संशोधन हुन्छ, गरिन्छ, गर्ने हो । किनभने हाम्रो राजनीतिक सहमतिमा नै यही कुरा थियो । यसमा तलमाथि गर्ने कुनै पनि कुरा छैन ।’
यसको साथै उहाँले नीतिगत रुपले संविधान संशोधनको विपक्षमा नभएको भन्दै त्यसका लागि कार्यदल बनाएर अगाडि बढेको बताउनुभयो ।
उहाँले भन्नुभयो, ‘नीतिगत रुपले हामी संविधान संशोधनको विपक्षमा होइन । अस्ती भर्खर दुई दलको आठ सदस्य उच्च राजनीतिक संयन्त्रले पनि निर्देशन दिएको छ । संविधान संशोधन गर्न, संघीयता र संविधान कार्यान्वयनको समस्या पहिलाउन, संसद्मा अहिलेसम्म भइरहेको १९ वटा विधेयकहरु जुन बाँकी छन् त्यसलाई यहीँ अधिवेशनबाट पारित गर्नका लागि के के गर्नु पर्छ भनेर कार्यदलहरु गठन भएको छ ।’
२३ पुसमा प्रधानमन्त्री केपी शर्मा ओलीले एमाले केन्द्रीय कमिटी बैठकमा ‘संसद्को अहिलेको कार्यकालमा दुईतिहाइ पुगेन भने ०८७ मा संविधान संशोधन हुन्छ,’ भन्ने अभिव्यक्ति दिनुभएको थियो । उक्त अभिव्यक्तिपछि विभिन्न टिकाटिप्पणी सुरु भएको छ । सोही विषयलाई लिएर मन्त्री गुरुङले स्पष्टीकरण दिन खोज्नुभएको हो ।