मौसम खराबीका कारण रारा विमानस्थलबाट उडान ठप्प
मुगु, २० साउन । मौसम खराबीका कारण तीन दिनदेखि रारा विमानस्थलमा उडान हुन सकेको छैन । बर्सादको समयमा मौसममा खराबी आइरहँदा रारा ताल्चा विमानस्थलमा तीन दिनदेखि उडान हुन नसकेको रारा नागरिक उड्डयन कार्यालय मुगुले जनाएको छ ।
गएको शुक्रबार नेपालगञ्जबाट समिट एयरले यात्रु लिएर मुगुका लागि उडे पनि जुम्लाको सिन्जा क्षेत्रमा पुगेपछि मौसम खराबी आएको भन्दै १० मिनेट नजिक रहेको रारा विमानस्थलमा अवतरण नगरी पुनः नेपालगञ्ज विमानस्थल फर्केको थियो ।
आइतबार मौसम खुलेको भए पनि समिट एयरले पहिलो उडान हुम्ला, दोस्रो जुम्ला गरे पनि तेस्रो उडान राखिएको मुगुको उडान समय आउँदासम्म पुनः मौसममा खराबी आएपछि समिट एयरले आइतबारको आफ्नो रारा विमानस्थलको उडान स्थगित गर्न बाध्य भएको थियो ।
तीन दिनदेखि उडान नभएपछि नेपालगञ्ज भएर मुगु आउने यात्रु र रारा विमानस्थलबाट नेपालगञ्ज, सुर्खेत ,काठमाडौँ जाने यात्रुहरु अलपत्र परेका छन् ।
आज नभए भोलि उडान होला भन्दै होटेलमा बास बस्दा खर्च बढ्दै गएको यात्रुहरुको गुनासो छ ।
उडान नहुँदा मुख्य गरी वर्षे बिदामा घर गएका शिक्षकहरु, बिरामी, प्रदेश कार्यालय, समीक्षा गोष्ठीमा गएका कर्मचारीहरू प्रभावित भएका छन् । रारामा नियमित उडान भर्ने तीत निजी एयरलायन्सहरुमध्ये तारा एयर मर्मत् सम्भारका लागि काठमाडौँ र सीता एयरको आफ्नै प्रशासनिक कामले मुगु उडान नगरेपछि समिट एयरले मात्र उडान भर्दै आएको थियो ।
सीता एयर मुगुका स्टेसन प्रमुख धिरेन्द्र भामले आफ्नो एयरलायन्सले पनि मौसमले साथ दिए सम्भवत सोमबारदेखि नियमित उडान गर्ने बताउनुभयो ।
रारामा आफूहरुले नियमित उडान गर्दै आए पनि मौसमले साथ नदिँदा उडान प्रभावित भएको समिट एयरका नेपालगञ्ज स्टेसन प्रमुख वसन्त मल्लले बताउनुभयो ।