नवजोत सिंह सिद्धु जेलबाट रिहा
एजेन्सी, १९ चैत । पूर्वक्रिकेटर तथा भारतीय कंग्रेसका नेता नवजोत सिंह सिद्धु जेलबाट रिहा भएका छन् । शनिबार उनी पटियाला जेलबाट रिहा भएको बिबिसी हिन्दीले जनाएको छ ।
भारतीय सर्वोच्च अदालतले उनलाई तीन दशकअघिको एउटा घटनामा एक वर्ष जेल सजाय सुनाएको थियो । उनी १० महिना जेल बसेर छुटेका हुन् । उनलाई सर्वोच्चले जेल सजाय सुनाएपछि सिद्धुले आत्मसमर्पण गरेका थिए ।
जेलबाट रिहा भएपछि उनले कंग्रेस नेता राहुल गान्धीको विषयमा टिप्पणी गरेका छन् । कंग्रेसका नेता गान्धीलाई सुरतस्थित अदालतले २ वर्ष जेल सजाय सुनाएको र लोकसभा सदस्य खारेज गरेको विषयमा टिप्पणी गरेका हुन् । “देशमा जबजब तानाशाही आएको छ । तब एउटा कान्ती पनि आएको छ । र यसपटक क्रान्तीको नाम राहुल गान्धी हो,” उनले भने, “हामी सरकारलाई हल्लाउँछौँ ।”
के थियो घटना ?
सन् १९८८ डिसेम्बर २७ का दिन पटियालाको एउटा पार्किङमा सिद्धुको ६५ वर्षीय गुरनाम सिंहसँग मारपिट भएको थियो । पछि गुरनामको मृत्यु भयो । सिद्धुलाई गैरनियतवश हत्याको आरोप लागेको थियो । त्यो बेला सिद्धुलाई जिल्ला अदालतले निर्दोष ठहर्याएको थियो । तर, उच्च न्यायालयले दोषी ठहर्याउँदै तीन वर्ष सजाय सुनाइदियो ।
सरकारको तर्फबाट मुद्दा लडेका वकिलका अनुसार उक्त दिन सिद्धु र उनका साथी रूपिन्दर सिंह संधु पटियालाको शेरनवाला गेटनजिकै गाडीमा जाँदै थिए । त्यहीँ पीडित गुरनाम सिंह र अरू दुई जना कारमा थिए । सवारी हटाउने विषयमा सिद्धु र उनका साथीको गुरनामसँग विवाद भयो । उनीहरूबीच कुटाकुट पनि भयो । यसबीच गुरनाम सिंह लडे । पछि अस्पतालमा उपचारका क्रममा उनको मृत्यु भयो ।
पुलिस रेकर्डका अनुसार घटनापछि सिद्धु र उनका साथी फरार थिए । पछि मृतकका परिवारको आग्रहमा सिद्धु र उनका साथीविरूद्ध मद्दा दर्ता भयो ।
जिल्ला अदालतपछि यो मुद्दा उच्च न्यायालयमा पुगेको थियो । सन् २००६ मा सिद्धु र उनका साथीलाई ३–३ वर्षको सजाय सुनाइयो । दुवैलाई जनही एक–एक लाख जरिवाना पनि तोकियो । पछि गुरनामको मृत्युबारे डाक्टरहरूको राय स्पष्ट नभएको भन्दै यो मुद्दा सर्वोच्चमा पुर्याइएको थियो ।
सर्वोच्चले सन् २०१८ मा सिद्धुलाई निर्दोष सावित गरेको थियो । तर, पीडित परिवारले यसविरूद्ध फेरि अपिल गरेको थियो । यसमै अदालतले अहिले आएर सिद्धुलाई दोषी ठहर्याउँदै एक वर्षको सजाय सुनाएको हो ।
पहिले सिद्धुविरूद्ध यो मुद्दा चलेका बेला उनी क्रिकेटमा सक्रिय थिए । सन् १९९९ उनले क्रिकेटबाट सन्यास लिए र कमेन्टेटरको रूपमा काम थाले । उनी अमृतसरका सांसद भए र पञ्जाबमा कंग्रेसका अध्यक्ष पनि भइसकेका छन् । अहिले उनी पन्जाब कंग्रेसका वरिष्ठ नेता हुन् ।