युक्रेनविरूद्धको लडाइँ रोक्ने चीनको प्रस्तावलाई सम्मानका साथ हेरेको छु : पुटिन

एजेन्सी, ७ चैत । रूसी राष्ट्रपति भ्लादिमिर पुटिनले सोमबार चिनियाँ राष्ट्रपति सी चिनफिङलाई युक्रेन द्वन्द्वको समाधानका लागि चीनका प्रस्तावलाई सम्मानका साथ हेरेको बताएका छन् ।

रूसको तीन दिने राजकीय भ्रमणका लागि मस्को पुगेका राष्ट्रपति सीलाई पुटिनले चीनको युक्रेन शान्ति योजनाबारे छलफल गर्ने बताएका छन् । चीनका राष्ट्रपति सी रूसका राष्ट्रपति पुटिनसँग भेटघाट गर्न मस्को पुग्नुले दुई राष्ट्रबीचको घनिष्ठ सम्बन्धलाई उजागार गरेको र किभ र यसका पश्चिमी सहयोगीहरूलाई यसबारे चनाखो रहने संकेत मिल्ने देखिएको छ । राष्ट्रपति सीले आफ्ना रूसी समकक्षी पुटिनलाई आगामी वषए हुने राष्ट्रपतीय निर्वाचनमा रूसी जनताको समर्थन प्राप्त हुनेमा आफू विश्वस्त रहेको समेत उल्लेख गरेका छन् ।

मस्कोमा जारी भ्रमणको सुरूवातमा अनौपचारिक वार्तामा बोल्दै राष्ट्रपति पुटिनले हालैका दशकहरूमा चीनको द्रुत विकासबाट रूस ‘अलिकति इर्ष्यालु’ भएको पनि बताएका छन् । यसैबीच युक्रेन र बेलायतले चिनियाँ नेतालाई आफ्नो प्रभाव प्रयोग गर्न र मस्कोलाई युुद्ध अन्त्य गर्न दबाब दिन आग्रह गरेका छन् । पछिल्लो समय बेलायतले चीनले क्षेत्रीय अखण्डताको सम्मानका लागि आफ्नो समर्थनलाई समर्थन गर्न र रूसलाई युक्रेनमा युद्ध अन्त्य गर्न आग्रह गरेको छ ।

साथै किभले चीनले युक्रेनमा युद्ध अन्त्य गर्न रूसमाथि आफ्नो प्रभावको कूटनीति प्रयोग गर्ने अपेक्षा युक्रेनी विदेश मन्त्रालयका प्रवक्ता ओलेग निकोलेन्कोले बताएका छन् । रूसको राजकीय भ्रमणको पहिलो दिन एक दोभाषेमार्फत् बोल्दै राष्ट्रपति सीले पुटिनलाई धन्यवाद दिँदै बेइजिङले मस्कोसँग घनिष्ठ सम्बन्ध राख्नुपर्ने बताएका छन् ।

रूस–युक्रेन युद्ध सन् २०२२ फेब्रुअरी २४ मा सुरू भएयता चीनका राष्ट्र प्रमुखबाट आफ्नो छिमेकी र नजिकको रणनीतिक साझेदार रहेको देश रूसको भ्रमण गरेको यो पहिलो पटक हो ।

चीनका राष्ट्रपति सीको रूस भ्रमण हेगको अन्तर्राष्ट्रिय फौजदारी अदालतले पुटिनलाई युक्रेनमा युद्ध अपराध गरेको आरोप लगाएको केही दिनपछि आएको हो । शुक्रबार सीको मस्को यात्राको घोषणापछि ह्वाइट हाउसले चीनबाट सम्भावित प्रस्तावकहरूको बारेमा चिन्ता व्यक्त गरेको छ । राष्ट्रपति सीको यस भ्रमणबाट विश्व राजनीतिमा नयाँ तरंग पैदा भएको छ ।