बेलायतका राजाले आफ्नो राज्याभिषेकमा अमेरिका गएका छोरा बुहारीलाई बोलाए
एजेन्सी, २२ फागुन । बेलायतका राजा चार्ल्सले अमेरिका गएका छोरा–बुहारीलाई आफ्नो राज्याभिषेकमा बोलाएका छन् ।
समाचार संस्था रोयटर्सका अनुसार बेलायत छोडेर अमेरिकामा बसिरहेका चार्ल्सका कान्छा छोरा ह्यारी र बुहारी मेघनलाई आगामी मेमा हुने उनको राज्याभिषेकका लागि निम्तो पठाइएको छ ।
ह्यारी र मेघन राज्याभिषेक समारोहमा उपस्थित हुने/नहुने टुंगो भइसकेको छैन । पछिल्लो समय बेलायती राजपरिवार र ह्यारी–मेघन सम्बन्ध तिक्ततापूर्ण छ ।
केही दिनअघि पूर्वराजकुमार ह्यारी र उनकी पत्नी मेघन मार्कललाई बेलायतमा रहेको उनीहरूको घर खाली गर्न भनिएको थियो ।
द गार्डियनका अनुसार ह्यारी र मेघनका एक जना प्रवक्ताले बेलायती राजपरिवारले उनीहरूलाई विन्डसर क्यासलनजिकै रहेको फ्रगमोर कटेज खाली गर्न भनेको बताएका छन् । यो भवन १७औँ शताब्दीमा बनेको बताइन्छ ।
ह्यारीले आफ्नो आत्मकथा ‘स्पेयर’ सार्वजनिक गरेपछि बेलायती राजपरिवार र ह्यारी–मेघन सम्बन्धमा थप तिक्तता आएका बेला उनीहरूलाई घर खाली गर्न भनिएको हो । बेलायतका राजा चर्ल्सले यो कुरालाई स्वीकृति दिएका छन् ।
ह्यारी र मेघन केही दिनमै यो घर छोडेमा राजा चार्ल्सको राज्याभिषेक हुनुअघि नै ह्यारी–मेघनको बेलायती राजपरिवारसँगको सम्बन्ध थप कमजोर हुने छ ।
ह्यारी र मेघनलाई खाली गर्न भनिएको अर्का राजकुमार एन्ड्रुलाई दिइएको बताएको छ उनी पनि अहिले राजकीय पदमा छैनन् ।