चितुवा बोकेको भाइरल तस्बिरको वास्तविकता
कुस्मा, १९ फागुन । पर्वतमा आज एउटा गाउँमा चितुवा भेटियो । त्यसको केहीक्षणमा नै मान्छेले चितुवालाई बोकेर गाउँ डुलाएको भिडिओ र तस्बिर सामाजिक सञ्जालमा ‘भाइरल’ हुँदै गएको छ । पर्वतवासीको साहस र बहादुरीलाई कथा बनाएर तस्बिर एकपछि अर्को गर्दै फेसबुकमा राख्ने सिलसिला रोकिएको छैन ।
“के साँच्चिकै गाउँलेले जिउँदो चितुवा समाएका हुन् त ?” सामाजिक सञ्जालमा जिउँदो चितुवा भन्दै बोकेर खिचाएका भाइरल तस्बिर प्रहरीले झुटो भएको बताएको छ । बिहान १० बजेतिर फलेवास नगरपालिका–२ थापाठानको गहतेमा गाउँलेले चितुवा देखेर प्रहरीलाई खबर गरेपछि प्रहरी त्यहाँ पुगेको थियो ।
“हामी १० बजे आसपासमा चितुवा भएको ठाउँमा पुगेका थियौँ । बेहोस अवस्थामा रहेको चितुवा एकैछिन पछि जुरूक्क उठे पनि धानिन नसक्ने भएकाले यताउति गर्दै बारीको काल्लामुनि खस्यो,’ कार्कीनेट प्रहरी चौकीका प्रहरी सहायक निरीक्षक विष्णु अधिकारीले भने,“त्यसको १० मिनेटपछि चितुवा मर्यो । त्यहाँ वरिपरि रहेको युवामा मरेको चितुवा उचाल्दै फोटो खिच्न तँछाडमछाड नै भयो । चितुवाको मुचुल्का उठाउँदा त्यस्तो बाहिरी घाउ चोट केही देखिएको छैन ।”
डिभिजन वन कार्यालय पर्वतको टोलीले घटनास्थल पुगेर मृत्यु भएको चितुवालाई कार्यालयमा ल्याइपुर्याएको छ । कार्यालयले चितुवा बुढो भएर शिकार गर्न नसक्ने भएपछि मरेको हुन सक्ने बताएको छ । “चितुवा २० किलो जतिका छ,” निमित्त वन अधिकृत विष्णुप्रसाद अधिकारीले भने, “बुढ्यौलीले शिकार गर्न सक्ने तागत नहुनु र वन जंगलमा चितुवाका लागि आहार नभेटिँदा कमजोर भएर मरेको हो भन्ने देखिन्छ ।”
एक वर्षअघि पनि पर्वतमा बिरामी अवस्थामा रहेको चितुवाको घाँटीमा डोरीले बाँधेर बजारमा घुमाएको भिडिओ र तस्बिर सामाजिक सञ्जालमा भाइरल भएको थियो ।
उक्त चितुवालाई राष्ट्रिय प्रकृति संरक्षण् कोष–जैविक विविधता संरक्षण केन्द्र सौराहामा पठाइएको थियो । चितवन राष्ट्रिय निकुञ्ज र केन्द्रका भेटेरिनरी टिम तथा वन्यजन्तु प्राविधिकको उपचार र स्याहार सम्भावपश्चात् चितुवा तन्दुरूस्त भएकाले निकुञ्ज छेउको जंगलमा छोडएको थियो ।