मुस्ताङको थासाङमा बस दुर्घटना, १७ जना घाइते
मुस्ताङ, ३ फागुन । मुस्ताङको जोमसोमबाट पोखरातर्फ जाँदै गरेको बस मुस्ताङको थासाङ गाउँपालिका–३ स्थित धम्पु सडकबाट कालीगण्डकी नदीमा खसेको छ ।
जोमसोमबाट १७ जना यात्रु लिएर पोखरातर्फ जाँदै गरेको ना७ख ७४४० नम्बरको म्याग्दी कोरला यातायात प्रालिको बस बुधबार बिहान साढे ८ बजेतिर दुर्घटनामा परेको जिल्ला प्रहरी कार्यालय मुस्ताङले जानकारी दिएको छ ।
बसमा सवार १७ जना यात्रुमध्ये ४ जना गम्भीर घाइते भएका छन् । अन्य यात्रु भने सामान्य घाइते छन् ।
राष्ट्रिय गौरवको बेनी–जोमसोम सडकको धम्पुस्थित सडकको बायाँ करिब ५४ मिटर तल कालीगण्डकी नदीमा बस खसेको प्रहरी नायब उपरीक्षक (डिएसपी) रविन्द्रनाथ पौडेलले जानकारी दिए ।
गम्भीर घाइते यात्रुलाई थप उपचारका लागि पोखरा पठाइएको छ भने सामान्य घाइते यात्रुलाई थासाङ–३ स्थित लेते प्राथमिक स्वास्थ्य केन्द्रमा उपचार भइरहेको डिएसपी पौडेलले जानकारी दिए ।