टर्की भूकम्प : मृत्यु हुनेको संख्या ३४ हजार नाघ्यो
काठमाडौँ, १ फागुन । गएको सोमबारको विनाशकारी भूकम्पमा परी टर्की र सिरियामा मृत्यु हुनेको संख्या कम्तिमा ३४ हजार १७९ पुगेको छ ।
टर्कीमा मात्र मृत्यु हुनेको संख्या २९ हजार ६०५ पुगेको त्यहाँका आपत्कालीन समन्वय केन्द्र साकोमले जनाएको छ ।
भूकम्पमा परी सिरियामा मृत्यु हुनेको संख्या ३ हजार ५७४ पुगेको छ । उत्तरीपश्चिमी सिरियाको विपक्षी नियन्त्रित भूभागमा मात्र ३ हजार १६० जनाको मृत्यु भएको सिएनएनले उल्लेख गरेको छ ।
त्यहाँको सरकारी समाचार एजेन्सी सानाका अनुसार भूकम्पमा परी सिरिया सरकार नियन्त्रित भूभागमा १ हजार ४१४ जनाको मृत्यु भएको छ ।
मानवीय सहायता परिचालनमा समन्वय गरिरहेका संयुक्त राष्ट्रसंघका अधिकारीले करिब ५३ लाख सिरियाली घरबारविहीन भएको अनुमान गरेको छ । टर्की र सिरियामा ९ लाख भूकम्प पीडितलाई तातो खाना तत्काल आवश्यक भएको बताएका छन् ।
टर्कीको दक्षिणी प्रान्त कहरामनामारसमा स्थानीय समयअनुसार गत सोमबार बिहान ४ः१७ बजे ७.८ म्याग्निुच्युडको भूकम्प गएको थियो भने त्यसको केही मिनेटपछि देशको दक्षिणी प्रान्त गाजियान्टेपमा ६.४ म्याग्निच्युडको भूकम्प गएको थियो । त्यस्तै, सोही दिन दिउँसो १ः२४ मा ७.६ म्याग्निच्युडको भूकम्प गएको थियो ।