बाढीले बाटो बगाउँदा मेलम्ची–हेलम्बु सडक अवरुद्ध
सिन्धुपाल्चोक, ५ साउन । गएरातिको वर्षासँगै आएको बाढीले मेलम्ची–हेलम्बु सडक खण्डको ठाउँ–ठाउँमा बाटो बगाउँदा यातायात सेवा अवरुद्ध भएको छ ।
बाढीले हेलम्बुको चनौटेमा गत वर्षको बाढीपछि बनाइएको सडक क्षतविक्षत बनेको स्थानीयवासी बलसुत खड्काले बताए ।
यस्तै, हेलम्बुको ढुंगेबजार र मेलम्चीको सीमखेतमा पनि सडक अवरुद्ध भएको छ ।
स्थानीयकाअनुसार हेलम्बु–काठमाडौँ सडकअन्तर्गत ग्याल्थुममा पहिरो खसेको छ भने बाढी पसेर सडक भत्काएको छ । जसले गर्दा काठमाडौँबाट सिन्धुपाल्चोक जाने तथा सिन्धुपाल्चोकबाट काठमाडौँ आउने सवारी साधन तथा यात्रु बीच बाटोमै अलपत्र परेका छन् ।
गएराति सिन्धुपाल्चोकको मेलम्ची खोलास्थित नाकोते र आसपासमा भारी वर्षा भएको थियो । जल सतह बढेपछि मेलम्ची तटीय क्षेत्रमा बाढी तथा भिरालो जमिन भएको ठाउँमा पहिरो जानसक्ने भएकाले सतर्कता अपनाउन स्थानीय प्रशासनले आग्रह गरेको छ ।