बागलुङको ताराखोला गाउँपालिकाको अध्यक्षमा माओवादीका विक विजयी
- थम्मन थापा
बागलुङ । ताराखोला गाउँपालिकाको अध्यक्षमा गठबन्धनको तर्फबाट नेकपा (माओवादी केन्द्र)का उम्मेदवार धनबहादुर विश्वकर्मा (हिमाल) विजयी भएका छन् उनी १९५ मतान्तरले विजयी भएका हुन् ।
गाउँपालिकामा कुल ५ हजार ५०१ मत खसेकोमा गठबन्धनको तर्फबाट अध्यक्षका उम्मेदवार बनेका विकले २ हजार २८५ मत प्राप्त गरी गाउँपालिका अध्यक्षमा विजयी भएका हुन् । उनका निकटतम प्रतिद्वन्द्वी स्वतन्त्र उम्मेदवार प्रकाश घर्तीले २ हजार ९० मत प्राप्त गरे ।
त्यस्तै, गाउँपालिकाको उपाध्यक्षमा गठबन्धनको तर्फबाट नेपाली कांग्रेसका उम्मेदवार भीमबहादुर रोका विजयी भएका छन् । उनी २ हजार ८४२ को मतान्तरले विजयी बनेका हुन् । उनले ३ हजार ४०३ मत प्राप्त गरेका छन भने उनका निकटतम प्रतिद्वन्द्वी नेकपा (एमाले)का थममाया घर्तीले ५६१ मत प्राप्त गरेकी छन् ।
ताराखोला गाउँपालिकाको वडा नम्बर १ मा यमबहादुर श्रीस, २ मा भद्र घर्ती, ३ मा कर्णबहादुर भण्डारी, ४ जितबहादुर खत्री र ५ मा मनबहादुर खत्री विजयी भएका छन् । गाउँपालिकामा वडा सदस्य बाहेकको पदमा गठबन्धनको प्यानल नै विजयी भएको हो ।