हामीले चुनाव जितिसक्यौँ, अब मतपत्रमा बदलिन मात्र बाँकी : पौडेल

बाँके, २२ वैशाख । नेपाली कांग्रेसका तर्फबाट राप्तीसोनारी गाउँपालिकाको अध्यक्ष पदका उम्मेदवार तप्तबहादुर पौडेलले घरदैलोका क्रममा गाउँपालिकाबासीले देखाएको माया, सद्भाव र विश्वास देखेर आफूहरुले चुनाव जितिसकेको बताएका छन् ।

राप्तीसोनारी गाउँपालिका वडा नम्बर २ मा आयोजित बृहत् कोणसभालाई सम्बोधन गर्दै पौडेलले भने, “१४ गतेदेखि हामी निरन्तर घरदैलोमा छौँ, यहाँका स्थानीयहरुले हामी पुग्दा जुन माया, स्नेह, सद्भाव र विश्वास देखाउनुभएको छ, त्यो हेर्दा हामीले चुनाव जितिसकेका छौँ, हामीले अध्यक्ष, उपाध्यक्षसहित ९ ओटै वडा जित्छौं ।” पौडेलले आफूहरुप्रतिको अगाढ विश्वास अब मतपत्रमा बदलिन मात्र बाँकी रहेको बताए ।

उपाध्यक्षकी उम्मेदवार मनिषासिंह थारुले गाउँपालिकाबासीले कांग्रेसलाई ठुलो भरोसा गरिरहेकाले राप्तीसोनारीमा फेरि पनि कांग्रेसले जित्ने उद्घोष गरिन् ।

पालिका सभापति भीमबहादुर राना क्षेत्रीले राप्तीसोनारीबासीले यसअघि कांग्रेसलाई जिताएर सेवा गर्ने मौका दिएको र त्यो मौकालाई कांग्रेसले राम्रोसँग निभाएको भन्दै अपूरा कामहरु पूरा गर्न फेरि कांग्रेसलाई नै जिताउने मुडमा रहेको बताए ।