इंग्ल्यान्डले भारतलाई फराकिलो अन्तरले हरायो
काठमाडौं । टेष्ट च्याम्पियनसीप २०२१–२३ अन्तर्गत भारतविरुद्धको तेस्रो टेष्टमा इंग्ल्यान्ड फराकिलो अन्तरले विजयी भएको छ ।
खेलको चौथो दिन आज भारतलाई २७८ रनमा समेट्दै एक इनिङ्स ७६ रनले पराजित गर्दै सिरिजमा १–१ को बराबरी गरेको हो ।
पहिलो पारीमा ३५४ रनको फराकिलो अन्तरले पछि परेको भारतले दोस्रो इनिङ्समा सम्हालिएको प्रदर्शन गरेपनि २७८ रनको स्कोरमा समेटियो ।
भारतका लागि चेतेश्वर पुजराले ९१, रोहित शर्माले ५९, कप्ता विराट कोहलीले ५५ तथा रविन्द्र जडेजाले ३० रन बनाए ।
भारतलाई सस्तैमा समेट्ने क्रममा इंग्ल्यान्डका ओली रोबिन्सनले ५, क्रेग ओभर्टनले ३ तथा जेम्स एन्डरसन र मोइन अलीले समान १–१ विकेट लिए ।
हेडिङ्गलेमा टस जितेर पहिले ब्याटिङ रोजेको भारतले पहिलो पारीमा ७८ रन मात्र बनाएको थियो ।
घरेलु टोली इंग्ल्यान्डले पहिलो पारीमा कप्तान जो रुटको शतकीय इनिङ्सको मद्धतमा ४३२ रन बनाएको थियो ।
टेष्ट क्रिकेटमा २२औँ शतक प्रहार गरेका रुटले १६५ बलमा १४ चौकाको मद्धतमा १२१ रनको योगदान दिए । यस्तै, पहिलो विकेटका लागि १३५ रनको शतकीय साझेदारी गरेका रोरी ब्रुन्सले ६८ र हसीब हमीदले ६८ रन बनाए ।
इंग्ल्यान्डका डेविड मलानले ७०, क्रेग ओभर्टनले ३२ तथा जोनी बेइस्ट्रोले २९ रनको पारी खेले ।
जितसँगै इंग्ल्यान्डले पाँच खेलको टेष्ट सिरिजमा १–१ को बराबरी गरेको छ ।
यसअघि भएको पहिलो टेष्ट बराबरीमा सकिएको थियो भने दोस्रो टेष्टमा भारत १५१ रनले विजयी भएको थियो ।